முக்கியப் பிரச்சினையைப் பேசியிருக்கிறது: மெர்சல் படத்துக்கு ரஜினி பாராட்டு

முக்கியப் பிரச்சினையைப் பேசியிருக்கிறது என்று 'மெர்சல்' படத்துக்கு ரஜினி தனது பாராட்டைத் தெரிவித்திருக்கிறார்

அட்லி இயக்கத்தில் விஜய் நடிப்பில் வெளியாகியிருக்கும் படம் 'மெர்சல்'. இப்படத்தில் இடம்பெற்றுள்ள ஜிஎஸ்டி தொடர்பான வசனங்களுக்குப் பாஜக கட்சித் தலைவர்கள் கடும் ஆட்சேபம் தெரிவித்து வருகிறார்கள். இதனால் பெரும் சர்ச்சை உருவாகியுள்ளது.

பல்வேறு திரையுலக பிரபலங்கள் 'மெர்சல்' படத்திற்கு ஆதரவாக குரல் கொடுத்தனர். ஆனால், ரஜினி மட்டும் எந்ததொரு கருத்தையுமே தெரிவிக்கவில்லை. இதனை சமூகவலைத்தளத்தில் பலரும் குறையாக தெரிவித்து வந்தார்கள்.

இந்நிலையில், '2.0' படப்பிடிப்பு முழுமையாக முடிந்துவிட்டு சென்னை திரும்பிய ரஜினிகாந்திற்கு 'மெர்சல்' படத்தை பிரத்யேகமாக திரையிட்டு காட்டினார்கள். படம் பார்த்துவிட்டு தனது ட்விட்டர் பக்கத்தில் ரஜினிகாந்த் கூறியிருப்பதாவது:

முக்கியப் பிரச்சினையைப் பேசியிருக்கிறது. படம் அருமை. வாழ்த்துகள் மெர்சல் குழு

இவ்வாறு அவர் தெரிவித்திருக்கிறார்.