ரஜினிக்காக பாட்ஷா 2 கதை தயார்: இயக்குநர் சாய்ரமணி

ரஜினிக்காக 'பாட்ஷா 2' கதை தயாராக இருப்பதாக 'மொட்ட சிவா கெட்ட சிவா' இயக்குநர் சாய்ரமணி தெரிவித்திருக்கிறார்.

லாரன்ஸ் நடிப்பில் வெளியான 'மொட்ட சிவா கெட்ட சிவா' படத்தின் இயக்குநர் சாய்ரமணி. அப்படம் விமர்சன ரீதியாக கடும் பின்னடவை சந்தித்தாலும், வசூல் ரீதியில் போதிய வரவேற்பைப் பெற்றது. ரஜினியை சந்தித்து லாரன்ஸ் மற்றும் இயக்குநர் சாய்ரமணி இருவருமே மரியாதை நிமித்தமாக சந்தித்து நன்றி தெரிவித்தார்கள்.

இந்நிலையில் ரஜினிக்காக 'பாட்ஷா 2' கதையை தயார் செய்திருப்பதாக தெரிவித்திருக்கிறார் இயக்குநர் சாய்ரமணி. இது குறித்து அவருடைய ஃபேஸ்புக் பதிவில் கூறியிருப்பதாவது:

ரஜினி சாருக்காக 'பாட்ஷா 2' கதையை ரெடி செய்து விட்டேன்....போஸ்டர் லிங்க் இணைத்துள்ளேன் நண்பர்களே. ரஜினி  இன்னும் கதையை கேட்கவில்லை

இவ்வாறு அவர் தெரிவித்திருக்கிறார்.

ரஜினி படங்களின் வரிசையில், அனைத்து தரப்பு மக்களையும் கவர்ந்து மாபெரும் வரவேற்பு பெற்ற படம் 'பாட்ஷா'. சுரேஷ்கிருஷ்ணா இயக்கியிருந்த படத்தில் ரஜினி, நக்மா, ரகுவரன், விஜயகுமார் உள்ளிட்ட பலர் நடித்திருந்தனர். தேவா இசையமைத்து இருந்தார். 1995-ம் ஆண்டு இப்படம் வெளியானது.