மெர்சல் விஜய் ரசிகர்களுக்கு விருந்து: இயக்குநர் சுசீந்திரன்

'மெர்சல்' விஜய் ரசிகர்களுக்கு விருந்து என்று தனது ட்விட்டர் பக்கத்தில் இயக்குநர் சுசீந்திரன் தெரிவித்திருக்கிறார்.

அட்லி இயக்கத்தில் விஜய், நித்யா மேனன், சமந்தா, காஜல் அகர்வால், சத்யராஜ், எஸ்.ஜே.சூர்யா, வடிவேலு, யோகிபாபு உள்ளிட்ட பலர் நடிப்பில் வெளியாகியிருக்கும் படம் 'மெர்சல்'. ஏ.ஆர்.ரஹ்மான் இசையமைத்துள்ள இப்படத்துக்கு ஜி.கே.விஷ்ணு ஒளிப்பதிவு செய்திருந்தார். தேனாண்டாள் பிலிம்ஸ் தயாரித்து வெளியிட்டு இருக்கிறது.

இப்படத்தைப் பார்த்துவிட்டு இயக்குநர் சுசீந்திரன் தனது ட்விட்டர் பக்கத்தில் கடிதமொன்றை வெளியிட்டு இருக்கிறார். அதில் அவர் கூறியிருப்பதாவது:

பிரம்மாண்டமான பட்ஜெட்-ல் நல்ல சமூக கருத்து. விஜய் சாருக்கு அதிகம் நடிக்க வாய்ப்பு கிடைத்த திரைப்படம், அதை சிறப்பாக செய்துள்ளார். விஜய் சார் என்றால் மாஸ், சமந்தா - விஜய் சார் காதல் காட்சிகள், விஜய் சாரின் நக்கல் கலந்த வசன உச்சரிப்பு, வடிவேலு சாரின் இந்தியாவின் தற்போதைய நிலையை "இந்தியாவுல எல்லாரும் பொறக்க கையதா நக்கிட்டு இருக்கானுங்க" என்று ஏடிஎம் கார்டுஐ பற்றி கூறுவது, அனல் அரசு-வின் சண்டைக் காட்சிகள், ஷோபி மாஸ், கேமிரா மேன் விஷ்ணு, அட்லி என அனைவரும் கடினமாக உழைத்து உள்ளனர். ரஹ்மான் சாரின் பின்னணி இசை, பாடல்கள் இரண்டுமே செம. 'மெர்சல்' விஜய் ரசிகர்களுக்கு விருந்து

இவ்வாறு அவர் தெரிவித்திருக்கிறார்.