இந்தியன் 2 தயாரிப்பாளர் மாற்றம்?

ஷங்கர் இயக்கத்தில் கமல் நடிக்கவுள்ள 'இந்தியன் 2' படத்தின் தயாரிப்பாளர் மாற்றப்பட்டுள்ளதாக தகவல் வெளியாகியுள்ளது.

'பிக் பாஸ்' நிகழ்ச்சியின் இறுதிப் போட்டியில் 'இந்தியன் 2' குறித்த அதிகாரப்பூர்வ அறிவிப்பு வெளியிடப்பட்டது. ஷங்கர் இயக்கத்தில் கமல் நடிக்க, தில் ராஜு தயாரிப்பார் என்று அறிவித்தார்கள்.

'விஸ்வரூபம் 2' மற்றும் 'சபாஷ் நாயுடு' ஆகிய படத்தின் பணிகளைத் தொடர்ந்து, 'இந்தியன் 2' படத்தில் கவனம் செலுத்த முடிவு செய்திருக்கிறார் கமல். மேலும், 'இந்தியன் 2' படத்துக்காக தன் உடலிழைக்கும் பணியிலும் ஈடுபட்டு வருகிறார்.

'2.0' படத்தின் பணிகள் முடிந்தவுடன் 'இந்தியன் 2' பணிகளை கவனிக்கவுள்ளார் இயக்குநர் ஷங்கர். இந்நிலையில் தயாரிப்பு பொறுப்பிலிருந்து தில் ராஜு விலகியிருக்கிறார். தற்போது இப்படத்தை லைகா நிறுவனமே தயாரிக்க முன்வந்துள்ளதாக தகவல்கள் வெளியாகியுள்ளன.

விரைவில் தயாரிப்பாளர் மாற்றம் குறித்த அதிகாரப்பூர்வ அறிவிப்பு வெளியாகவுள்ளது. '2.0' படத்தைப் போலவே 'இந்தியன் 2' படத்தையும் பிரம்மாண்டமாக தயாரிக்க திட்டமிட்டு இருக்கிறது லைகா நிறுவனம்.