பாகுபலி 2-வில் கிராபிக்ஸ் மேற்பார்வையாளர் மாற்றம்

ராஜமெளலி இயக்கத்தில் உருவாக இருக்கும் 'பாகுபலி 2' படத்தின் கிராபிக்ஸ் மேற்பார்வையாளராக கமலக்கண்ணன் ஒப்பந்தம் செய்யப்பட்டு இருக்கிறார்.

ராஜமெளலி இயக்கத்தில் பிரபாஸ், ராணா, அனுஷ்கா, தமன்னா, சத்யராஜ், நாசர், ரம்யா கிருஷ்ணன் உள்ளிட்ட பலர் நடிப்பில் வெளியான படம் 'பாகுபலி'. ஆர்கா மீடியா நிறுவனம் தயாரித்து, தமிழில் ஸ்டூடியோ கிரீன் நிறுவனம் வாங்கிய இப்படத்தை, ஸ்ரீதேனாண்டாள் பிலிம்ஸ் நிறுவனம் வெளியிட்டது. இந்திய அளவில் பெரும் வரவேற்பைப் பெற்ற இப்படம், வசூலையும் வாரிக் குவித்தது.

'பாகுபலி' படத்தின் கிராபிக்ஸ் காட்சிகளை 'எந்திரன்', 'ஐ' உள்ளிட்ட படங்களுக்கு பணியாற்றிய ஸ்ரீனிவாஸ் மோகன் மேற்பார்வையில் காட்சிப்படுத்தினார்கள். கிராபிக்ஸ் காட்சிகளுக்கு பெரும் வரவேற்பு கிடைத்தது குறிப்பிடத்தக்கது. விரைவில் 'பாகுபலி 2' படத்தின் படப்பிடிப்பு துவங்க இருக்கிறது. இதற்கான முதற்கட்ட பணிகள் நடைபெற்று வருகின்றன.

இந்நிலையில் 'பாகுபலி 2' படத்தின் கிராபிக்ஸ் காட்சிகள் மேற்பார்வையாளராக கமலக்கண்ணன் நியமிக்கப்பட்டு இருக்கிறார். இது தொடர்பாக 'பாகுபலி' படத்தின் அதிகாரப்பூர்வ ஃபேஸ்புக் பக்கத்தில், "'மகதீரா', 'ஈகா' உள்ளிட்ட படங்களுக்கு கிராபிக்ஸ் மேற்பார்வையாளராக பணிபுரிந்த கமலக்கண்ணன் 'பாகுபலி 2' படத்திற்கு பணியாற்ற இருக்கிறார். இவர் பல்வேறு மாநில விருதுகளும், கிராபிக்ஸ் காட்சிகளுக்காக இரண்டு முறை தேசிய விருது வென்றிருப்பது நினைவுகூரத்தக்கது" என்று தெரிவித்திருக்கிறார்கள்.

'எந்திரன் 2' படத்துக்காக ஸ்ரீனிவாஸ் மோகன் ஒப்பந்தம் செய்யப்பட்டு இருப்பதால், இப்படத்தில் இருந்து விலகி இருக்கிறார் என தகவல்கள் வெளியாகியுள்ளன.