உலக அளவில் 150 கோடி ரூபாயை வசூலித்த பீஸ்ட்

விஜய் நடிப்பில் வெளியான 'பீஸ்ட்' திரைப்படம் வெளியான நான்கு நாளில் உலக அளவில் ரூ.150 கோடிக்கு மேல் வசூலித்துள்ளது.

கடந்த 13-ம் தேதி நெல்சன் திலீப்குமார் இயக்கத்தில் விஜய் நடிப்பில் வெளியான திரைப்படம் 'பீஸ்ட்'. பூஜா ஹெக்டே நாயகியாக நடித்த இந்த படத்தில், அபர்ணா தாஸ், செல்வராகவன், யோகிபாபு, விடிவி கணேஷ், உள்ளிட்ட பலரும் நடித்திருந்தனர். கலவையான விமர்சனங்களை பெற்று வரும் 'பீஸ்ட்' படத்திற்கு 'கேஜிஎஃப் 2' திரைப்படம் வசூல் ரீதியாக கடும் போட்டியை கொடுத்தது. இந்நிலையில், 'பீஸ்ட்' படம் இந்திய பாக்ஸ் ஆபிஸ் அறிக்கையின்படி, உலகம் முழுவதும் 150 கோடி ரூபாய் வசூல் செய்துள்ளது. ரூ.150 கோடியை வசூல் செய்த விஜய்யின் 6வது படம் 'பீஸ்ட்' என்பது குறிப்பிடத்தக்கது.

'பீஸ்ட்' வெளியான 4--வது நாளான நேற்று வாரவிடுமுறை நாளாக இருந்த போதிலும் ரூ.25 கோடியை மட்டுமே படம் வசூல் செய்துள்ளது. இது முந்தைய நாட்களை விட மிகவும் குறைவு. படம் வெளியான முதல் நாள் திரையரங்குகள் நிரம்பி வழிந்தன. ஆனால், அடுத்தடுத்த நாட்களில் கூட்டம் குறைந்து, திரையரங்குகளில் சுமார் 80சதவீத இடங்களே நிரம்பின. மேலும், ஞாயிற்றுகிழமையான இன்று பல திரையரங்குகளில் டிக்கெட்டுகள் காலியாக உள்ளன.

'பீஸ்ட்' படம் முதல் நாள் உலக அளவில் ரூ. 65 கோடி வசூலித்தது. 2-வது நாளில் கிட்டத்தட்ட முதல் நாளில் பாதியை வசூலித்தது. அதாவது ரூ. 32 கோடியும், 3ஆம் நாள் படம் சுமார் 30 கோடியும், 4ஆம் நாளில் 25 கோடியும் வசூலித்ததாக கூறப்படுகிறது.