திரைப்பட விழாக்களில் கலக்கி வரும் ‘மனுசங்கடா’

15-வது சென்னை சர்வதேச திரைப்பட விழாவின் தமிழ்ப் பட போட்டி பிரிவில் இடம்பெற்றிருக்கும் திரைப்படம், அம்சன்குமார் இயக்கியிருக்கும் ‘மனுசங்கடா’. இன்று மாலை(டிசம்பர் 18) 6 மணிக்கு ரஷ்ய கலாச்சார மையத் திரையரங்கில் திரையிடப்படுகிறது.

மும்பை சர்வதேச திரைப்பட விழா , சர்வதேச இந்திய திரைப்பட விழாவின் இந்திய பனோரமா பிரிவு , யுனெஸ்கோ காந்தி விருதுக்கான போட்டி பிரிவு மற்றும் கெய்ரோ உலகத் திரைப்பட விழா உட்பட இந்த ஆண்டில் மிக அதிகமான சர்வதேசப் திரைப்பட விழாக்களில் கலந்துகொண்டு விமர்சகர்கள், உலகப் பார்வையாளர்களின் பாராட்டுகளைப் பெற்றுவரும் தமிழ்ப் படம் என்கிற சிறப்பினை பெற்றுள்ளது. இதில் நடித்துள்ளவர்கள் பலரும் திரைக்கு புதியவர்களே தவிர நடிப்புக்கு புதியவர்கள் அல்லர். ஏற்கனவே கூத்துப்பட்டறை உள்ளிட்ட பல நாடகக்குழுக்கள் நடத்திய நாடகங்களில் நடித்தவர்கள்.

தமிழகத்தின் பட்டி தொட்டிகளிலெல்லாம் ஒலித்தது மறைந்த எழுற்சிக் கவிஞர் இன்குலாபின் பாடல் ‘மனுசங்கடா’. அதுவே படத்தின் தலைப்பு . படத்திற்கென இன்குலாப் பிரத்யேகமாக பாடல் வரிகளையும் எழுதிக்கொடுத்திருக்கிறார்

இந்த இயக்குநர், எழுத்தாளர், செயற்பாட்டாளர் அம்ஷன் குமார் பல குறிப்பிடத்தக்க ஆவணப் படங்களை எடுத்துள்ளார். அவரது ‘எல்லைகள் கடந்த இசை’ என்கிற தவில்மேதை யாழ்ப்பாணம் தெட்சணாமூர்த்தி பற்றி இவர் எடுத்த ஆவணப்படத்திற்கு தேசிய விருது கிடைத்தது. ஏற்கெனவே கி.ராஜநாராயணன் எழுதிய ‘கிடை’ குறுநாவலைத் தழுவி ‘ஒருத்தி’ திரைப்படத்தை இயக்கினார். அந்தப் படம் புதுவை அரசின் சிறந்த திரைப்பட விருதினைப் பெற்றது . தமிழகத்தில் வணிக சினிமாவிற்கு அப்பாற்பட்டு திரைப்படங்கள் பெறவேண்டிய வளர்ச்சி பற்றி அதிகம் எழுதியும் மாற்றுப்ப படங்கள் எடுத்தும் தொடர்ந்து பணியாற்றி வருபவர் அம்ஷன்குமார். அந்த வகையில் சென்னை திரைபடவிழாவில் இன்றைய முக்கிய தமிழ்த் திரைப்படமாக ‘மனுசங்கடா’ பார்வையாளர்களிடம் எதிர்பார்ப்பை உருவாக்கியிருக்கிறது.

படம் பற்றிய விவரங்கள்

ஏ கே பிலிம்ஸ் ‘மனுசங்கடா’

நடிப்பு : ராஜீவ் ஆனந்த், சசிகுமார் , விதுர் , ஆனந்த் சம்பத்

ஷீலா , மணிமேகலை .

எழுத்து இயக்கம் : அம்ஷன் குமார்

தயாரிப்பு : எஸ்.தாரா & கண.நற்குணன் .

ஒலிப்பதிவு: ராஜேஷ் சசிதரன்

ஒளிப்பதிவு : பி.எஸ்.தரன்

இசை : அரவிந்த்—சங்கர்

பாடல் :இன்குலாப்

படத்தொகுப்பு :தனசேகர்