பல்லாவரத்தில் செப். 2-ல் தனியார் வேலைவாய்ப்பு முகாம்

செங்கல்பட்டு: தமிழகத்தின் முன்னாள் முதல்வர் கருணாநிதியின் நூற்றாண்டு விழாவை முன்னிட்டு, செங்கல்பட்டு மாவட்ட நிர்வாகம், மாவட்ட வேலைவாய்ப்பு மற்றும் தொழில்நெறி வழிகாட்டும் மையம், தமிழ்நாடு நகர்ப்புற ஊரக வாழ்வாதார இயக்கம் ஆகியவை இணைந்து சிறப்பு தனியார் துறை வேலைவாய்ப்பு முகாமை செப். 2-ம் தேதி, செங்கல்பட்டு மாவட்டம், பல்லாவரம் வட்டத்தில் உள்ள வேல்ஸ் அறிவியல், தொழில்நுட்பம் மற்றும் உயர் கல்வி நிறுவன வளாகத்தில், நடத்த உள்ளன.

இம்முகாமில் 200-க்கும் மேற்பட்ட தனியார் துறை நிறுவனங்கள் மற்றும் திறன் பயிற்சி அளிக்கும் நிறுவனங்கள் கலந்து கொண்டு தங்களுக்கான மனிதவள தேவைக்கான நபர்களை நேர்முகத் தேர்வு மூலம் தேர்வு செய்ய உள்ளனர். இந்த வேலைவாய்ப்பு முகாமில் 8, 10, 12-ம் வகுப்பு, பட்டப் படிப்பு பொறியியல், ஐடிஐ மற்றும் டிப்ளமோ படித்த நபர்கள், செவிலியர்கள், மாற்றுத் திறனாளிகள் போன்றவர்கள் தேர்ந்தேடுக்கப்பட உள்ளனர்.

வயது வரம்பு 18 முதல் 40 வயது வரை உள்ளவர்கள் தங்களுடைய கல்விச் சான்று, பாஸ்போர்ட் அளவிலான புகைப்படத்துடன் காலை 9 மணி முதல் மாலை 3 மணி வரை வேலைவாய்ப்பு முகாமில் நேரில் கலந்து கொண்டு பயன்பெறலாம். மேலும், வேலை வாய்ப்பு முகாமில் பங்குபெற விருப்பமுள்ள நபர்கள் https://tnprivatejobs.tn.gov.in இணையதளம் மூலம் பதிவு செய்யுமாறு கேட்டுக்கொள்ளப்படுகிறது. மேலும், தனியார் துறை வேலைவாய்ப்பு முகாமில் பணி நியமனம் பெறுபவர்களின் வேலைவாய்ப்பு அலுவலக பதிவு ரத்து செய்யப்படாது என மாவட்ட நிர்வாகம் தெரிவித்துள்ளது.