ராணுவ தளவாட உற்பத்தியில் ஈடுபடும் உலகின் 100 பெரிய நிறுவனங்கள் பட்டியலில் இடம்பிடித்த இந்தியாவின் எச்ஏஎல், பெல்

ஸ்டாக்ஹோம்: உலக அளவில் உள்ள 100 மிகப்பெரிய ராணுவத் தளவாட நிறுவனங்களை சுவீடனைத் தலைமையிடமாகக் கொண்ட ஸ்டாக்ஹோம் சர்வதேச அமைதி ஆராய்ச்சி நிறுவனம் (எஸ்ஐபிஆர்ஐ) பட்டியலிட்டுள்ளது. அதில் இந்தியாவைச் சேர்ந்த இந்துஸ்தான் ஏரோனாடிக்ஸ் (எச்ஏஎல்), பாரத் எலக்ட்ரானிக்ஸ் (பெல்) ஆகிய 2 பொதுத்துறை நிறுவனங்கள் இடம்பிடித் துள்ளன.

சென்ற ஆண்டில் இந்துஸ்தான் ஏரோனாடிக்ஸ் நிறுவனத்தின் தளவாட விற்பனை ரூ.27,060 கோடியாக உள்ள நிலையில் இந்தப் பட்டியலில் 42-வது இடத்தைப் பிடித்துள்ளது. பாரத் எலக்ட்ரானிக்ஸ் நிறுவனம் 63-வது இடத்தில் உள்ளது. சென்ற ஆண்டில் அதன் விற்பனை ரூ.14,760 கோடி ஆகும்.

இந்தப் பட்டியலில் அமெரிக்காவைச் சேர்ந்த 40 நிறுவனங்கள் இடம்பிடித்துள்ளன. அந்நிறுவனங்களின் விற்பனை ரூ.24.5 லட்சம் கோடி ஆகும். 27 ஐரோப்பிய நிறுவனங்களும் 8 சீன நிறுவனங்களும் இந்தப் பட்டியலில் இடம்பெற்றுள்ளன. சீன நிறுவனங்களின் தளவாட விற்பனை ரூ.8.9 லட்சம் கோடி ஆகும்.

விநியோகச் சங்கிலியில் நெருக்கடி ஏற்பட்டிருந்த போதிலும், 2020-ம் ஆண்டுடன் ஒப்பிடுகையில் 2021-ல் ராணுவ தளவாட விற்பனை அதிகரித்து இருக்கிறது என்று ஸ்டாக்ஹோம் சர்வதேச அமைதி ஆராய்ச்சி நிறுவனம் தெரிவித்துள்ளது. பட்டியலில் இடம்பெற்றுள்ள 100 நிறுவனங்களின் விற்பனை 2021-ல் ரூ.48.5 லட்சம் கோடியாக உள்ளது. இது 2020-ம் ஆண்டுடன் ஒப்பிடுகையில் 1.9% அதிகம்.

கரோனா ஊரடங்கு தளர்வையடுத்து 2021-ல் விநியோகச் சங்கிலியில் நெருக்கடி ஏற்பட்டது. இதனால், சரக்குகளை ஏற்றுமதி - இறக்குமதி செய்வது பெரும் சிக்கலுக்கு உள்ளானது. இவ்வாண்டு பிப்ரவரி மாதம் தொடங்கிய ரஷ்யா - உக்ரைன் போர், விநியோக நெருக்கடியை தீவிரப்படுத்தியது. விநியோகக் கட்டமைப்பில் நெருக்கடி ஏற்பட்டிருக்காதபட்சத்தில் ராணுவ தளவாட விற்பனை இன்னும் பல மடங்கு உயர்ந்திருக்கும் என்று அந்நிறுவனம் தெரிவித்துள்ளது.