பீட்டர் ஃபெர்டினன்ட் ட்ரக்கர் 10

அமெரிக்க வேளாண்மை முன்னோடி

‘நவீன வணிக மேலாண்மைத் துறையின் தந்தை’ எனப் போற்றப்படும் அமெரிக்க எழுத்தாளர், பீட்டர் ஃபெர்டினன்ட் ட்ரக்கர் (Peter Ferdinand Drucker) பிறந்த தினம் இன்று (நவம்பர் 19). அவரைப் பற்றிய அரிய முத்துக்கள் பத்து:

* ஆஸ்திரியத் தலைநகர் வியன்னா வில் யூதப் பெற்றோருக்குப் பிறந்த வர் (1909). தந்தை வழக்கறிஞர். தாய் மருத்துவர். முதலில் வியன்னா விலும் பின்னர் இங்கிலாந்திலும் பயின்றார். பட்டப்படிப்புக்குப் பிறகு சர்வதேச சட்டத்தில் முனைவர் பட்டம் பெற்றார்.

* சிறுவயது முதலே தன்னைச் சுற்றிலும் காணப்படும் அன்றாட நிகழ்வுகளில் அதிகக் கவனம் செலுத்தி வந்தார். இங்கிலாந்தில் ஒரு பன்னாட்டு வங்கியில் பொருளாதார நிபுணராகப் பணியாற்றினார். 1937-ல் அமெரிக்கா சென்றார். அங்குள்ள பெனிங்டன் கல்லூரியில் தத்துவப் பேராசிரியராகப் பணியாற்றினார்.

* பின்னர் நியுயார்க் பல்கலைக்கழகத்தின் மேலாண்மை பட்டக் கல்லூரியில் 20 ஆண்டுகளுக்கு மேலாக பேராசிரியராகப் பணிபுரிந்தார். 1971-ல் கலிபோர்னியாவில் க்ளேர்மாண்ட் பட்டக் கல்லூரியில் சமூக அறிவியல் பேராசிரியராகப் பணியாற்றினார். எழுத்தார்வம் காரணமாக வழக்கறிஞர் தொழிலைக் கைவிட்டு, ப்ரீலான்ஸ் பத்திரிகையாளராகவும் பிசினஸ் ஆலோசகராகவும் களம் இறங்கினார்.

* வாசிப்பில் அளவு கடந்த நாட்டம் கொண்டிருந்தார். ஒவ்வொரு ஆண்டும் ஒரு புதிய விஷயத்தைத் தேர்ந்தெடுத்துக் கொண்டு அது தொடர்பாக ஏராளமான நூல்களைப் படிப்பார்.

* வர்த்தகம், நிறுவனம், தொழிலாளர் - முதலாளி குறித்த திட்டவட்டமான நிலைப்பாடுகளைக் கொண்டிருந்தார். நிர்வாகத் திறனுக்கும் வயதுக்கும் எந்த சம்பந்தமும் கிடையாது என்பார். தனது 30-வது வயதில் ‘தி என்ட் ஆஃப் எகனாமிக் மேன்’ என்ற நூலை எழுதியதன் மூலம் இதை நிரூபித்தார். இந்த நூலைப் படித்த வின்ஸ்டன் சர்ச்சில், ‘தனது அதிரடிக் கருத்துகளால் நம் சிந்தனையைத் தூண்டியவர்’ எனப் பாராட்டினார்.

* நிர்வாகத் திறனை அனுபவம் மூலமாக மட்டுமே பெற முடியும் என்பதை இவரது பேச்சுகளும் எழுத்தும் மாற்றியமைத்தன. எதிர்பாராத வெற்றி, தோல்வி இரண்டுமே பரிசீலிக்கப்பட வேண்டியவை என்றார்.

* பிசினஸ், மேலாண்மை குறித்து ஏராளமாக எழுதினார். பொருளாதாரம், தொழில்நுட்பம், மனோதத்துவம், கலை இவை அனைத்தும் வர்த்தகத்திலும், மேலாண்மையிலும் இரண்டறக் கலந்துள்ளன என்று கூறினார். இவரது மேலாண்மைக் கோட்பாடுகள் ‘மேனேஜ்மென்ட் பை ஆப்ஜக்டிவ்ஸ்’ என்று குறிப்பிடப்படுகின்றன.

* ‘பிராக்டிஸ் ஆஃப் மேனேஜ்மென்ட்’, ‘தி இன்ட்ரொடக்டிவ் வ்யு ஆஃப் மேனேஜ்மென்ட்’, ‘ஹான்ட்புக் ஆஃப் மேனேஜ்மென்ட் பை ஆப்ஜக்டிவ்’, ‘மேனேஜ்மென்ட் சாலஞ்சஸ் ஃபார் ட்வன்டி ஃபர்ஸ்ட் சென்சுரி’ ஆகியன மற்றும் சுயசரிதை, இரண்டு நாவல்கள் உட்பட 40-க்கும் மேற்பட்ட நூல்களை எழுதியுள்ளார்.

* இவரது பல நூல்கள் தமிழ் உட்பட 20-க்கும் மேற்பட்ட மொழிகளில் மொழிபெயர்க்கப்பட்டு உலகம் முழுவதும் பிரபலமடைந்துள்ளன. அமெரிக்காவின் ‘பிரசிடென்ஷியல் மெடல் ஆஃப் ப்ரீடம்’, ‘கிரான்ட் சில்வர் மெடல்’, ‘ஆஸ்திரியன் கிராஸ் ஃபார் சயின்ஸ் அன்ட் ஆர்ட்ஸ்’ உள்ளிட்ட பல்வேறு விருதுகளையும் பரிசுகளையும் பெற்றுள்ளார்.

* உலகம் முழுவதும் உள்ள 25 பல்கலைக்கழகங்கள் இவருக்கு கவுரவ டாக்டர் பட்டம் வழங்கின. 92 வயது வரை எம்.பி.ஏ. மாணவர்களுக்கு பேராசிரியராக வழிகாட்டியவர். நிர்வாகவியல் சிந்தனைகளின் முன்னோடியாகப் போற்றப்பட்ட பீட்டர் ஃபெர்டி னன்ட் ட்ரக்கர், 2005-ம் ஆண்டு 96-வது வயதில் மறைந்தார்.