எர்வின் ஷ்ரோடிங்கர் 10

நோபல் பரிசு பெற்ற ஆஸ்திரிய இயற்பியலாளரும், குவான்டம் இயற்பியலின் முன்னோடியுமான எர்வின் ஷ்ரோடிங்கர் (Erwin Schrodinger) பிறந்த தினம் இன்று (ஆகஸ்ட் 12). அவரைப் பற்றிய அரிய முத்துக்கள் பத்து :

l ஆஸ்திரியா தலைநகர் வியன்னாவில் (1887) பிறந்தார். தந்தை தாவரவியல் ஆராய்ச்சியாளர். இத்தாலிய பாணி ஓவியம் வரைவதில் நிபுணர். சிறுவன் எர்வின் வீட்டிலேயே ஆங்கிலம், ஜெர்மன் மொழி கற்றான்.

l வியன்னா பல்கலைக்கழகத்தில் பயின்று 1910-ல் முனைவர் பட்டம் பெற்றார். அங்கேயே இயற்பியல் துறையில் ஆராய்ச்சியாளர் பதவியை ஏற்றார். முதல் உலகப் போரின்போது, ராணுவத்தில் பணியாற்றினார். பண்டைய இலக்கிய, இலக்கணங்களிலும் ஆர்வம் கொண்டவர். ஜெனா, ஸ்டுட்கார்ட், பிரஸ்லாவ் கல்லூரிகளில் பணிபுரிந்தார். பிறகு, ஜூரிச் பல்கலைக்கழகத்தில் 6 ஆண்டுகள் பேராசிரியராகப் பணியாற்றினார்.

l கோட்பாட்டு இயற்பியலில் ஆராய்ச்சிகள் செய்து பல கட்டுரைகளை வெளியிட்டார். தனது ஆசிரியர் ஃபிரென்ஸ் எக்ஸ்னருடன் இணைந்து பணியாற்றினார். அதிர்வலைகள் கோட்பாடு, பிரவ்னியன் இயக்கம், கணிதப் புள்ளியியல், அணுவியல் கோட்பாடுகள் குறித்தும் ஆராய்ந்தார்.

l ஷ்ரோடிங்கர் அலை சமன்பாட்டை உருவாக்குவதற்கான ஆராய்ச்சிகளை 1926-ல் தொடங்கினார். அணுவில் உள்ள பொருட்களின் அலைப்பண்பு இயக்கத்தை விளக்கும் அடிப்படைச் சமன்பாட்டை நிறுவினார். நியூட்டனின் விதிகளுக்கு இணையான முக்கியத்துவம் பெற்றதாக ஷ்ரோடிங்கர் சமன்பாடு கருதப்படுகிறது. இதற்காக பிரிட்டிஷ் இயற்பியலாளர் பால் டிராக்குடன் சேர்த்து இவருக்கு இயற்பியலுக்கான நோபல் பரிசு 1933-ல் வழங்கப்பட்டது.

l எலெக்ட்ரான் குவான்டம் நிலையில் துகள்களாகவும், அலைகளாகவும் இரண்டுவிதமாக இயங்கும். சூப்பர்பொசிஷன் எனப்படும் இந்நிலையை இவர், எளிமையான ‘கேட் (பூனை) தியரி’ மூலம் விளக்கினார்.

l ஹிட்லர் அதிகாரத்துக்கு வந்த பிறகு ஜெர்மனியில் இருக்க வேண்டாம் என்று முடிவு செய்தார். ஆஸ்திரியா, பெல்ஜியம், ரோமில் பல்வேறு கல்வி நிறுவனங்களில் 7 ஆண்டுகள் பணிபுரிந்தார். பிறகு இங்கிலாந்து ஆக்ஸ்ஃபோர்டு பல்கலைக்கழகத்தில் ஃபெலோஷிப் பெற்று பணிபுரிந்தார்.

l அயர்லாந்தின் டப்ளின் நகரில் அட்வான்ஸ்டு ஸ்டடீஸ் ஆஃப் டப்ளின் என்று புதிதாக தொடங்கப்பட்ட கல்வி நிறுவனத்தில் இணைந்தார். அங்கு இயற்பியல் உயர்கல்வித் துறை இயக்குநராக பொறுப்பேற்றார். 1955-ல் ஓய்வு பெறும் வரை அங்கு பணிபுரிந்தார்.

l புவிஈர்ப்பு விசை, மின்காந்தத் தன்மை குறித்து தொடர்ந்து ஆராய்ச்சியில் ஈடுபட்டார். இயற்பியல், தத்துவம், வரலாற்று அறிவியல் குறித்தும் ஆராய்ச்சி செய்தார். தன் ஆராய்ச்சிகள் பற்றி பல கட்டுரைகளை வெளியிட்டார்.

l இவர் சிறந்த தத்துவவாதியும்கூட. பண்டைய கிரேக்க அறிவியல் தத்துவங்கள் குறித்து தான் செய்த ஆராய்ச்சிகளை ‘நேச்சர் அண்ட் தி கிரீக்ஸ்’ நூலில் குறிப்பிட்டுள்ளார். ‘வாட் ஈஸ் லைஃப்’, ‘மை வ்யூ ஆஃப் தி வேர்ல்டு’ உள்ளிட்ட நூல்களையும் எழுதியுள்ளார்.

l அறிவியலில் ஏறக்குறைய அனைத்து பிரிவுகளிலும் குறிப்பிடத்தக்க பங்களிப்பை வழங்கியவரும், பன்முகத் திறன் கொண்ட அறிவியலாளருமான எர்வின் ஷ்ரோடிங்கர் 74 வயதில் (1961) மறைந்தார்.