வோலே சொயிங்கா 10

இலக்கியத்துக்கான நோபல் பரிசு பெற்ற நைஜீரிய நாடக ஆசிரியர், கவிஞர் வோலே சொயிங்கா (Wole Soyinka) பிறந்த தினம் இன்று (ஜூலை 13). அவரைப் பற்றிய அரிய முத்துக்கள் பத்து:

l ஆப்பிரிக்க நாடான நைஜீரியாவின் அபியுகுடா என்ற நகரில் (1934) பிறந்தவர். இவரது தந்தை பாதிரியார், தலைமை ஆசிரியராக பணியாற்றியவர். அறிவுக்கூர்மை மிக்க சிறுவன் சொயிங்கா சளைக்காமல் கேள்வி கேட்கும் இயல்பு கொண்டவன். சமாளிக்க முடியாத பெரியவர்கள் அவனைக் கண்டாலே ஓட்டம் எடுப்பார்களாம்.

l மதக் கல்வியோடு, தன் தாத்தா வின் பழங்குடியின பழக்க வழக்கங் களையும் கற்றார். இபாடன் நகரில் அரசு கல்லூரியில் பயின்ற பின், லண்டன் சென்று லீட்ஸ் பல்கலைக்கழகத்தில் கல்வியைத் தொடர்ந்தார். அங்கு ‘தி ஈகிள்’ என்ற கல்லூரி இதழின் ஆசிரியராகப் பணியாற்றினார்.

l ஆங்கில இலக்கியத்தில் இளங்கலைப் பட்டம் பெற்றார். ‘பிளாக் ஆர்பியஸ்’ என்ற இலக்கியப் பத்திரிகையில் இணை ஆசிரியராகப் பணியாற்றினார். ‘எ டான்ஸ் ஆஃப் தி ஃபாரஸ்ட்ஸ்’ என்ற தனது முதல் நாடகத்தை எழுதினார். இது நைஜீரிய அரசியல் பிரமுகர்களை நக்கலடித்தது.

l மாணவர்களுக்கு இலக்கியம், நாடகம் பயிற்றுவித்தார். நைஜீரியாவின் பல்வேறு பல்கலைக்கழகங்களில் உள்ள நாடகக் குழுக்களுக்குத் தலைமை ஏற்று நடத்தினார். லண்டனில் உள்ள ராயல் கோர்ட் தியேட்டரில் ஓராண்டு காலம் பணிபுரிந்தார்.

l இவர் எழுதிய பல நாடகங்கள் லண்டனிலும் நைஜீரியாவிலும் அரங்கேறின. வானொலியிலும் ஒலிபரப்பாகின. ராக்ஃபெல்லர் ஃபெலோஷிப் பெற்று நைஜீரிய நாடகங்கள் குறித்து ஆராய் வதற்காக நாடு திரும்பினார்.

l நைஜீரிய அரசியலிலும் முக்கியப் பங்காற்றினார். இங்கிலாந்திடம் இருந்து விடுதலை பெறுவதற்காக நடந்த போராட்டங்களில் தீவிரமாகப் பங்கேற்றார். 1967-ல் நைஜீரியாவில் நடந்த உள்நாட்டுப் போரின்போது கைது செய்யப்பட்டு 2 ஆண்டுகள் தனிமைச் சிறையில் அடைக்கப்பட்டார். ‘விமர்சனத்துக்கு இடமில்லாத சூழல் என்பது, சுதந்திரத்துக்கான மாபெரும் அச்சுறுத்தல்’ என்று குறிப்பிட்டுள்ளார்.

l இலக்கியத்துக்கான நோபல் பரிசை 1986-ல் பெற்றார். இந்த கவுரவத்தைப் பெற்ற முதல் ஆப்பிரிக்கர் இவர். இவரது படைப்புகள் நையாண்டி பாணியில் இருந்தாலும் அதிகார துஷ்பிரயோகத்தின் தீமைகளை அனைவருக்கும் உணர்த்தின.

l ஏராளமான கவிதைத் தொகுப்புகள், இலக்கிய கட்டுரைத் தொகுப்புகளை வெளியிட்டுள்ளார். நாடகம், சிறுகதை, நாவல், கட்டுரை, கவிதை என இதுவரை இவரது நூற்றுக்கணக்கான படைப்புகள் வெளிவந்துள்ளன. தனது சிறை அனுபவங்கள் குறித்த நூல் (தி மேன் டைடு: ப்ரிஸன் நோட்ஸ்), குழந்தைப் பருவ நினைவுகள் குறித்த நினைவுக் குறிப்பு நூல் ஆகியவற்றையும் எழுதியுள்ளார்.

l சிறப்பு அழைப்பின் பேரில் உலகின் பல பகுதிகளிலும் உள்ள கல்லூரி கள், பல்கலைக்கழகங்களுக்குச் சென்று இலக்கிய உரைகள் நிகழ்த்தி வருகிறார். லண்டன், அமெரிக்கா உட்பட பல நாடுகளிலும் இலக்கிய அமைப்புகளின் கவுரவ உறுப்பினராக தேர்ந்தெடுக்கப்பட்டவர்.

l அமெரிக்காவின் அனிஸ்பீல்டு உல்ப் புத்தக விருது உட்பட பல விருதுகள், பரிசுகள், கவுரவங்களைப் பெற்றுள்ளார். வோலே சொயிங்கா தற்போது 81 வயதிலும் ஆப்பிரிக்க இலக்கியத் தளத்திலும், அரசியல் களத்திலும் சுறுசுறுப்பாக இயங்கிவருகிறார்.