வே.தில்லைநாயகம் 10

தமிழக நூலகத் துறையின் முன்னோடியும், பொதுக் கல்வித் துறை இயக்க முதல் நூலகருமான வே.தில்லைநாயகம் (Ve.Thillainayagam) பிறந்த நாள் இன்று (ஜூன் 10). அவரைப் பற்றிய அரிய முத்துக்கள் பத்து:

l தேனி மாவட்டம் சின்னமனூரில் (1925) பிறந்தவர். தந்தை ஆசிரியர். கருங்கட்டான்குளம் நடுநிலைப் பள்ளி, உத்தமபாளையம் மாவட்டக் கழக உயர்நிலைப் பள்ளியில் பயின்றார். மதுரை அமெரிக்கன் கல்லூரியில் இடைநிலை, இளங்கலைக் கல்வி பயின்றார்.

l சென்னை பல்கலையில் நூலக அறிவியல், நாக்பூர் பல்கலையில் பொருளியல் முதுகலை, மதுரை தியாகராசர் கல்லூரியில் கல்வி இளங்கலை, டெல்லி பல்கலையில் நூலகவியல் முதுகலை முடித்தார். அண்ணாமலைப் பல்கலையில் பிரான்ஸ், ஜெர்மனி மொழிகளையும், மதுரை காமராசர் பல்கலையில் ஜோதிடமும் பயின்றார்.

l மாணவப் பருவத்திலேயே நூலகத் துறை மீது அதிக நாட்டம் கொண்டவர். 1949-ல் அரசு உதவியுடன் நூலகப் பயிற்சி பெற்ற இவர், பொதுக் கல்வித் துறை இயக்க முதல் நூலகராக நியமிக்கப்பட்டார். 1962-ல் கன்னிமாரா பொது நூலகத்தின் நூலகரானார். 1972-ல் தமிழக அரசு பொது நூலகத் துறையின் முதல் இயக்குநராக நியமிக்கப்பட்டார்.

l நூலகத் துறை இவரது தலைமையில் மிகச் சிறப்பாக இயங்கியது. மாபெரும் வளர்ச்சி கண்டது. நூற்றொகைகள், குழந்தை நூற்றொகைகள், நூல்கள், அறிமுக விழா மலர்களைப் பதிப்பித்தார்.

l எழுதுவதிலும் அதிக ஆர்வம் கொண்டிருந்தார். ‘இந்திய நூலக இயக்கம்’ என்னும் இவரது நூல், 40 ஆண்டுகளாக இவர் ஆராய்ந்து சேகரித்த தகவல்களுடன் 400 பக்கங்கள் கொண்டது. 4 ஆயிரம் ஆண்டுகால வரலாற்றை உள்ளடக்கியது. இவர் வெளியிட்ட ஆய்வறிக்கைகள் நூலக வளர்ச்சித் திட்ட ஆய்வேடுகளாகும்.

l நூலகத் துறை இயக்குநர் பதவியை தொடர்ந்து 10 ஆண்டுகள் வகித்தார். அந்த 10 ஆண்டு காலமும் தமிழக நூலக இயக்கத்தின் பொற்காலம் என்கின்றனர் வல்லுநர்கள். 1982-ல் ஓய்வு பெற்றார்.

l தமிழில் ‘வேதியம் 1008’ உட்பட 25 நூல்களை எழுதியுள்ளார். விரிவாக ஆராய்ந்தறிந்து எழுதக்கூடியவர். இந்திய நூலகத் துறை முன்னோடியான இரா.அரங்கநாதனின் எழுத்துகளால் கவரப்பட்டவர் என்பதால், இவரது எழுத்துகளில் அவரது தாக்கம் தென்படும். ஆங்கிலத்திலும் பல நூல்கள் எழுதியுள்ளார்.

l ‘நூலக உணர்வு’, ‘வள்ளல்கள் வரலாறு’, ‘இந்திய நூலக இயக்கம்’ ஆகிய இவரது நூல்கள் தமிழக அரசின் முதல் பரிசு பெற்றவை. இவரது ‘இந்திய நூலக இயக்கம்’ நூலைப் பாராட்டி உலகப் பல்கலைக்கழகம் 1982-ல் கவுரவ டாக்டர் பட்டம் வழங்கியது.

l ‘இந்திய அரசமைப்பு’ நூல் தமிழ்ப் பல்கலைக்கழகத்தின் பரிசைப் பெற்றது. இவரது ‘குறிப்பேடு’ என்ற நூல்தான் தமிழில் முதன்முதலாக வெளிவந்த ‘ஆண்டு நூல்’ (இயர் புக்). வானொலி நிகழ்ச்சிகளில் பங்கேற்று, நூலகத்தின் பெருமையை எடுத்துக்கூறியுள்ளார்.

l இந்தி, மராத்தி, கன்னடம், மலையாளத்தில் இவரது படைப்புகள் மொழியாக்கம் செய்யப்பட்டன. பல பல்கலைக்கழகங்களில் நிர்வாக உறுப்பினராக இருந்துள்ளார். தமிழகப் பொது நூலக இயக்கத்தின் தந்தை எனப் புகழப்படும் வே.தில்லைநாயகம் 88 வயதில் (2013) மறைந்தார்.