ஸ்டெஃபி கிராஃப் 10

டென்னிஸ் விளையாட்டில் சாதனை படைத்த ஜெர்மனி வீராங்கனை ஸ்டெஃபி கிராஃப் (Steffi Graf) பிறந்த நாள் இன்று (ஜூன் 14). அவரைப் பற்றிய அரிய முத்துகள் பத்து.

* மேற்கு ஜெர்மனியின் மன்ஹேய்ம் (Mannheim) நகரில் (1969) பிறந்தார். தந்தை பழைய கார் விற்பனையாளர். அவர் வீட்டிலேயே தன் 3 வயது மகள் ஸ்டெஃபிக்கு டென்னிஸ் கற்றுக்கொடுக்கத் தொடங்கினார். 4 வயதில் டென்னிஸ் மைதானத்தில் பயிற்சி பெறத் தொடங்கிய சிறுமி, 5 வயதுமுதல் டென்னிஸ் போட்டியில் கலந்துகொண்டாள்.

* டென்னிஸ்தான் அவள் சாதிப்பதற்கு ஏற்ற துறை என்பதை ஊகித்த பெற்றோர் 13 வயதில் பள்ளியில் இருந்து நிறுத்தினர். வீட்டில் ஒரு ஆசிரியர் மூலம் உயர்நிலைக் கல்வி கற்றாள்.

* முழுமையான தொழில்முறை வீராங்கனையாக 1983-ல் விளையாடத் தொடங்கினார். அப்போது, உலக டென்னிஸ் தரவரிசையில் அவரது இடம் 124. அதே ஆண்டு இறுதியில் 98, அடுத்த ஆண்டில் 22 என அதிரடியாக முன்னேறி, 1985-ல் 6-வது ரேங்க் என்ற நிலைக்கு உயர்ந்தார்.

* பிரபல சாம்பியன்கள் மார்ட்டினா நவரத்திலோவா, கிறிஸ் எவர்ட்டுக்கு சவாலாக முன்னேறினார் கிராஃப். அவர்களுடன் மோதி வெற்றி பெறவில்லை என்றாலும், அரையிறுதி, இறுதிப் போட்டிகள் வரை முன்னேறினார்.

* உலக மகளிர் டென்னிஸ் போட்டியில் 1986-ல் முதன்முதலாக கலந்துகொண்டபோது, கிறிஸ் எவர்ட்டை தோற்கடித்தார். அதன் பிறகு, எவர்ட்டிடம் இவர் ஒருமுறைகூட தோற்றதில்லை.

* இவரது டென்னிஸ் ஆட்டம் 1987-ல் மேலும் வலுப்பெற்றது. ஆரம்பத்திலேயே பிரெஞ்ச் ஓபன் போட்டிக்கு முன்னால் 6 போட்டிகளில் வென்றார். மியாமி போட்டியில் நவரத்திலோவாவை அரையிறுதியிலும், கிறிஸ் எவர்ட்டை இறுதிப் போட்டியிலும் வென்றது இவரது சாதனை வெற்றிகள். பிரெஞ்ச் ஓபன் அரையிறுதியில் செபாட்டினியையும், இறுதியாட்டத்தில் மார்ட்டினாவையும் தோற்கடித்தார்.

* ஆஸ்திரேலியன் ஓபன், டெக்சாஸ், சான் ஆன்டோனியோ போட்டிகளில் வென்றதோடு, மியாமி போட்டி பட்டத்தையும் 1988-ல் தக்கவைத்துக்கொண்டார். அந்த ஆண்டு நடந்த 4 கிராண்ட்ஸ்லாம் போட்டி பட்டங்களையும் அத்துடன் ஒலிம்பிக் தங்கப் பதக்கத்தையும் வென்றார். இதன்மூலம் ‘காலண்டர் இயர் கோல்டன் ஸ்லாம்’ அந்தஸ்தைப் பெற்ற முதல் மற்றும் ஒரே டென்னிஸ் நட்சத்திரம் என்ற பெருமையையும் பெற்றார்.

* மொத்தம் 7 விம்பிள்டன் ஒற்றையர் பட்டங்கள், 6 பிரெஞ்ச் ஓபன் ஒற்றையர் பட்டங்கள், 5 அமெரிக்க ஓபன் டென்னிஸ் போட்டி பட்டங்கள், 4 ஆஸ்திரேலியன் ஓபன் போட்டி பட்டங்களை வென்றுள்ளார்.

* தொடர்ந்து 186 வாரங்களுக்கு முதலிடத்தில் இருந்தவர். 11 இரட்டையர் போட்டிகளில் வென்றுள்ளார். 1999-ல் ஓய்வு பெறும்போது உலகத் தரவரிசையில் 3-ம் இடத்தில் இருந்தார். பிரபல டென்னிஸ் வீரர் ஆண்ட்ரே அகாசியை 2001-ல் திருமணம் செய்துகொண்டார்.

* பல விளம்பரங்கள், தொலைக்காட்சி நிகழ்ச்சிகளில் பங்கேற்று வரும் இவர், ‘சில்ரன் ஃபார் டுமாரோ’ என்ற தொண்டு அமைப்பை நிறுவி போர்களால் பாதிக்கப்படும் குழந்தைகளுக்கு உதவி வருகிறார்.