சுவாமி சின்மயானந்தா 10

உலகம் முழுவதும் ஆன்மிக வேதாந்தக் கருத்துகளைப் பரப்பிய சுவாமி சின்மயானந்தா (Swami Chinmayananda) பிறந்த தினம் இன்று (மே 8). அவரைப் பற்றிய அரிய முத்துக்கள் பத்து:

l கேரளாவின் எர்ணாகுளத்தில் (1916) பிறந்தார். இயற்பெயர் பாலகிருஷ்ணன் மேனன். தந்தை, புகழ்பெற்ற நீதிபதி. கொச்சி, திருச்சூரில் பள்ளிப் படிப்பை முடித்தார். எர்ணாகுளம் மஹாராஜா கல்லூரியில் எஃப்.ஏ. (ஃபெலோஆஃப் ஆர்ட்ஸ்), திருச்சூர் செயின்ட் தாமஸ் கல்லூரியில் பி.ஏ. பட்டம் பெற்றார்.

l லக்னோ பல்கலைக்கழகத்தில் இலக்கியம், சட்டத்தில் முதுகலைப் பட்டம் பெற்றார். ஊடகவியலும் பயின்றார். அரசியல், பொருளாதாரத்தில் பல சீர்திருத்தங்களை செய்யமுடியும் என்ற நம்பிக்கையில் ஊடகத் துறையில் பணியாற்றினார்.

l 1942-ல் வெள்ளையனே வெளியேறு போராட்டத்தில் பங்கேற்றார். கைது செய்யப்பட்டு சிறையில் அடைக்கப்பட்டார். சிறையில் இவர் உட்பட பல கைதிகளுக்கு விஷக் காய்ச்சல் ஏற்பட்டது. அவர்களை சிறை நிர்வாகம் கவனிக்காமல் வீதியில் வீசியது. ஒரு பெண்மணி பார்த்து மருத்துவமனையில் சேர்த்ததால் உடல்நலம் தேறினார்.

l பின்னர் நேஷனல் ஹெரால்டு பத்திரிகையில் பணியாற்றினார். ஒருமுறை ரிஷிகேஷ் சென்றபோது சுவாமி சிவானந்தரை சந்தித்தார். அது இவரது வாழ்வில் திருப்புமுனையாக அமைந்தது. ஆன்மிகத்தில் நாட்டம் கொண்டார். ஆன்மிகப் புத்தகங்களைப் படிக்கத் தொடங்கினார்.

l சுவாமி சிவானந்தர் 1949-ல் இவருக்கு தீட்சை அளித்து ‘சுவாமி சின்மயானந்தா’ என்று பெயர் சூட்டினார். இமயமலையில் இருந்த சுவாமி தபோவன மகராஜிடம் இவரை அனுப்பினார். அவரிடம் 8 ஆண்டுகள் கடுமையான ஆன்மிகப் பயிற்சிகளுடன் தத்துவமும் பயின்றார்.

l இவரது ஆழ்ந்த ஞானம் பற்றி அறிந்த சிவானந்தர், கீதை கமிட்டி தொடங்குமாறு கூறினார். வேதாந்த கருத்துகளை உலகெங்கும் பரப்ப குருவின் ஆசியுடன் புறப்பட்டார். உலகம் முழுவதும் ஆன்மிகச் சொற்பொழிவுகளை நிகழ்த்தினார்.

l பண்டைய வேத, புராணங்கள், இதிகாசங்கள் குறிப்பாக பகவத்கீதையை முழுவதுமாக அறிந்தவர் என்று போற்றப்பட்டார். கடினமான ஆன்மிக விஷயங்கள், தத்துவங்களைக்கூட எளிமையாக எடுத்துக் கூறியதால் அவரது உரையைக் கேட்க ஏராளமானோர் கூடினர். 1953-ல் ‘சின்மயா மிஷன்’ ஆசிரமத்தைத் தொடங்கினார். இந்த மையங்கள் தற்போது உலகம் முழுவதும் 300-க்கும் மேற்பட்ட இடங்களில் உள்ளன.

l உபநிடதங்கள், வேதங்கள், பகவத்கீதைக்கான இவரது விளக்க உரைகள் பிரசித்தி பெற்றவை. ஏறக்குறைய 95 நூல்கள் வெளிவந்துள்ளன. ஆங்கிலத்தில் எழுதப்பட்ட இவரது நூல்கள் தமிழ், இந்தி, மலையாளம், மராத்தி, தெலுங்கு, பிரெஞ்சு உள்ளிட்ட பல மொழிகளில் மொழிபெயர்க்கப்பட்டுள்ளன.

l இந்திய தத்துவத்துக்கான வருகைதரு பேராசிரியராக அமெரிக்கா மற்றும் ஆசிய நாடுகளின் பல்கலைக்கழகங்களில் பணியாற்றினார். உலகம் முழுவதும் ஆசிரமங்கள், பள்ளிகள், மருத்துவமனைகளை தொடங்கினார். கிராம மக்களின் வாழ்க்கைத் தரத்தை உயர்த்த ‘சின்மயா’ என்ற அமைப்பை உருவாக்கினார்.

l அத்வைத வேதாந்த ஞானம், பகவத்கீதை, உபநிடதங்கள் ஆகியவற்றை உபதேசித்தவர். 40 ஆண்டுகளுக்கு மேலாக சமூகப் பணியாற்றியவர். இந்தியாவின் குறிப்பிடத்தக்க ஆன்மிகத் தலைவர்களில் ஒருவராகப் போற்றப்படும் சுவாமி சின்மயானந்தா 77 வயதில் (1993) மறைந்தார்.