ஜார்ஜ் ஹிட்சிங்ஸ் 10

கீமோதெரபிஆராய்ச்சிக்காக நோபல் பரிசு பெற்ற அமெரிக்க மருத்துவர் ஜார்ஜ் ஹெர்பர்ட் ஹிட்சிங்ஸ் (George Herbert Hitchings) பிறந்த தினம் இன்று (ஏப்ரல் 18). அவரைப் பற்றிய அரிய முத்துக்கள் பத்து:

l அமெரிக்காவின் வாஷிங்டன் மாநிலம் ஹோக்வியம் என்ற பகுதியில் (1905) பிறந்தவர். கப்பல் கட்டுமானத்தில் சிறந்து விளங்கிய இவரது தாத்தாவைப் பின்தொடர்ந்து தந்தையும் அதே களத்தில் முத்திரை பதித்தார்.

l தந்தையின் பணி காரணமாக இவர், அமெரிக்காவின் பல்வேறு இடங்களில் வளர்ந் தார். சியாட்டிலில் உள்ள ஃபிராங்க்ளின் உயர்நிலைப் பள்ளியில் பயின்றார். சிறந்த மாணவராகத் திகழ்ந்தார்.

l இவரது 12-வது வயதில் தந்தை உடல்நலம் பாதிக்கப்பட்டு இறந்தது இவருக்குள் ஆழமான பாதிப்பை உண்டாக்கியது. மருத்துவம் படிக்கவேண்டும் என்ற உந்துதலையும் ஏற்படுத்தியது. அதற்கேற்பவே தன் பாடங்கள், ஆய்வுக்கான விஷயங்களைத் தேர்ந்தெடுத்தார்.

l வாஷிங்டன் பல்கலைக்கழகத்தில் 1927-ல் வேதியியலில் இளங்கலை பட்டம் பெற்றார். பின்னர் அதே பல்கலை.யின் உயிரியல் நிலையத்தில் பணியாற்றினார். அங்கு மேற்கொண்ட ஆய்வின் அடிப்படையில் அடுத்த ஆண்டு முதுநிலைப் பட்டம் பெற்றார். ஹார்வர்டு பல்கலைக்கழகத்தில் வேதியியல் துறை ஆசிரியராக சேர்ந்தார்.

l பிறகு ஹார்வர்டு மருத்துவக் கல்லூரியில் உயிரியல் ரசாயனத் துறை ஆசிரியராகப் பணியாற்றினார். 1933-ல் முனைவர் பட்டம் பெற்றார். அடுத்த 10 ஆண்டுகள் ஹார்வர்டிலும், கேஸ் வெஸ்டர்ன் ரிசர்வ் பல்கலைக்கழகத்திலும் பணிபுரிந்தார்.

‘வெல்கம்’ ஆய்வுக்கூடத்தின் உயிரி வேதியியல் துறையில் 1942-ல் பணிபுரிந்தார். 1944-ல் அங்கு மருந்துகள் தொடர்பான ஆராய்ச்சியில் ஈடுபட்டார். ரத்தப் புற்றுநோய் சிகிச்சைக்கு பயன்படும் 2,6-டைஅமினோப்யூரின் மற்றும் பி-குளோரோ ஃபீனாக்ஸி டைஅமினோ பைரிமிடின் உள்ளிட்டவை குறித்த ஆராய்ச்சியில் ஹிட்சிங்ஸ் தலைமையிலான குழு ஈடுபட்டது.

l கீமோதெரபிக்கான மருந்துப் பொருட்கள், பல்வேறு சிகிச்சைகளுக்கான நோய் எதிர்ப்பு மருந்துகள் தொடர்பான முக்கிய கோட்பாடுகளை இக்குழு வெளியிட்டது. இந்த கோட்பாடுகளை கண்டறிந்ததற்காக ஹிட்சிங்ஸ், சர் ஜேம்ஸ் பிளாக், கெர்ட்ரூட் எலியான் ஆகியோருக்கு கூட்டாக 1988-ல் நோபல் பரிசு வழங்கப்பட்டது. ஹிட்சிங்ஸின் கீமோதெரபி குறித்த ஆராய்ச்சிதான் அவர்களுக்கு நோபல் பரிசு கிடைக்க காரணமாக அமைந்தது. இதன்மூலம் ஹிட்சிங்ஸ் மேலும் புகழ்பெற்றார்.

l பரோஸ் வெல்கம் ஆராய்ச்சி அமைப்பின் துணைத் தலைவராக 1967-ல் பதவி ஏற்றார். ட்யூக் மருத்துவப் பல்கலைக்கழகத்தில் இணை ஆசிரியராகவும் பணியாற்றினார். உயிரி மருத்துவ ஆராய்ச்சிகளுக்கு உதவுவதற்காக தொடங்கப்பட்ட பரோஸ் வெல்கம் நிதி அமைப்பின் இயக்குநர், தலைவராகவும் பணியாற்றியுள்ளார்.

l அமெரிக்காவில் மருத்துவ வேதியியல் துறையில் நட்சத்திர அந்தஸ்து கொண்ட ‘ஹால் ஆஃப் ஃபேம்’ அரங்கிலும் இவரது பெயர் இடம்பிடித்தது. பல நாடுகளில் சுற்றுப்பயணம் செய்து, பல பல்கலைக்கழகங்களில் உரை நிகழ்த்தினார்.

l 20 ஆண்டுகளுக்கு மேல் தன் வாழ்வை பொது நலன்களுக்காக அர்ப்பணித்தவர். மருத்துவ ஆராய்ச்சிகள் மூலம் மனிதகுல நலனுக்கு மகத்தான பங்களிப்பை வழங்கிய ஜார்ஜ் ஹெர்பர்ட் ஹிட்சிங்ஸ் 93 வயதில் (1998) மறைந்தார்.