சாம் வால்டன் 10

உலகப் புகழ்பெற்ற வால் மார்ட், சாம்ஸ் கிளப் ஆகியவற்றின் நிறுவனர் சாமுவேல் மோர் வால்டன் (Samuel Moore Walton) பிறந்த தினம் இன்று (மார்ச் 29). அவரைப் பற்றிய அரிய முத்துக்கள் பத்து:

* அமெரிக்காவின் ஓக்லஹாமா மாநிலத்தில் விவசாயக் குடும்பத்தில் (1918) பிறந்தார். வீட்டில் இருந்த பசுவிடம் பால் கறந்து புட்டிகளில் அடைத்து விற்பது, செய்தித்தாள் விநியோகிப்பது ஆகிய வேலைகளை முடித்து விட்டு, பள்ளிக்கூடம் சென்றுவிடுவான் சிறுவன் சாம். படிப்பிலும் சிறந்து விளங்கினான்.

* 8-ம் வகுப்பு படிக்கும்போது ஈகிள் ஸ்கவுட் சேவைப் படைக்குத் தேர்வு செய்யப்பட்டார். மாநில கால்பந்து அணிக்கு தலைமை வகித்தார். ஓட்டப் பந்தய வீரராகவும் பிரகாசித்தார்.

* சேமித்த பணத்தைக் கொண்டு, மிசோரி பல்கலைக்கழகத்தில் சேர்ந்து பொருளாதாரப் பட்டம் பெற்றார். ஜே.சி.பென்னி நிறுவனத்தில் வேலைக்கு சேர்ந்தார். அங்கு ஒன்றரை ஆண்டு பணிபுரிந்து தொழில் நுணுக்கங்களைக் கற்றார்.

* 1942-ல் ராணுவத்தில் சேர்ந்து கேப்டன் பதவி வரை உயர்ந்தார். பின்னர் ஒரு பிரபல விற்பனை நிலையத்தின் விநியோக உரிமையை பெற்றார். 6 மாநிலங்களில் இந்த விற்பனை அங்காடிகள் அதிக லாபம் ஈட்டி முதலிடம் பெற்றன. ஏராளமான ரகங்கள், மலிவு விலை ஆகியவைதான் இவரது வெற்றி ரகசியங்கள்.

* கடையை வாடகைக்கு விட்டவரிடமே நல்ல லாபத்தில் அந்த வியாபாரத்தை விற்றுவிட்டு வேறொரு கடையை வாங்கினார். கடையைப் புதுப்பிக்க வேண்டியிருந்ததால், ‘புதுப்பித்தலுக்கு முந்தைய தள்ளுபடி விற்பனை’ என்று அறிவித்தார். விற்பனை பெருகியது.

* இதுபோல பல உத்திகளை செயல்படுத்தி வெற்றிகண்டார். செல்ஃப் சர்வீஸ் சேவையை அறிமுகப்படுத்தினார். நாடு முழுவதும் கிளைகள் திறந்தார். அமெரிக்காவின் நம்பர் ஒன் அங்காடியாக அது வளர்ந்தது.

* ரோஜர்ஸ், அர்கன்சாஸ் ஆகிய இடங்களில் 1962-ல் வால் மார்ட் டிஸ்கவுன்ட் சிட்டி ஸ்டோர் தொடங்கினார். தற்போது 6 லட்சத்துக்கும் அதிகமானவர்கள் இங்கு வேலை செய்கின்றனர்.

* அடுத்து, ஸ்டீஃபன் டெஸ்பாச் நிறுவனம் தொடங்கப்பட்டது. இதுவும் மகத்தான வெற்றி கண்டது. அமெரிக்கா முழுவதும் வால்மார்ட் சங்கிலித் தொடர் கடைகள் தொடங்கப்பட்டன. பல நாடுகளிலும் இது பரவியது.

* சிறு ஊர்களிலும் தன் கடைகளைத் தொடங்கினார். 1998-ல் டைம்ஸ் பத்திரிகை 20-ம் நூற்றாண்டின் செல்வாக்கு மிக்க நபராக இவரை தேர்ந்தெடுத்தது. ‘பிரெசிடென்ஷியல் மெடல் ஆஃப் ஃப்ரீடம்’ பதக்கம் பெற்றார். ‘சில்லறை வர்த்தகத்தில் நம்பர் ஒன் நிறுவனம்’ என்று போர்ப்ஸ் இதழில் தொடர்ச்சியாக 8 முறை அங்கிகரிக்கப்பட்டது வால்மார்ட்.

* இந்த நிறுவனத்தின் ஒவ்வொரு கிளையும் ஒரு மாணவரைத் தேர்ந்தெடுத்து கல்லூரியில் சேர்ந்து படிக்க உதவுகிறது. அமெரிக்காவின் சிறந்த தொழிலதிபரும் வறுமை நிலையில் இருந்து கோடீஸ்வரரானதோடு லட்சக்கணக்கானவர்களை முன்னேற வைத்த சாம் வால்டன் 74 வயதில் (1992) மறைந்தார்.