சாஹிர் லுதியான்வி 10

பிரபல உருதுக் கவிஞர், இந்தி திரைப்படப் பாடலாசிரியர் சாஹிர் லுதியான்வி (Sahir Ludhianvi) பிறந்த தினம் இன்று (மார்ச் 8). அவரைப் பற்றிய அரிய முத்துக்கள் பத்து:

* பஞ்சாப் மாநிலம் லூதியானாவில் (1921) பிறந்தவர். இயற்பெயர் அப்துல் ஹயீ சாஹிர். ஜமீன் குடும்பத்தைச் சேர்ந்தவர். அப்பா பிரிந்ததால், சிறு வயதில் இருந்தே அம்மாவிடம் வளர்ந்தார். இவ ரது இளமைப் பருவம் ஏழ்மையிலும் போராட்டத்திலும் கழிந்தது.

* கல்லூரியில் படிக்கும்போது, இவர் எழுதிய ஈரடிக் கவிதைகளால் பிரபலமானார். கல்லூரிப் படிப்பை முடிக்க முடியாத சூழல் ஏற்பட்டது. வாழ்க்கையை ஓட்டப் பல்வேறு வகையான வேலைகளைச் செய்தார்.

* 1943-ல் லாகூர் சென்றார். அதே ஆண்டில் ‘தல்கியா’ என்ற தனது முதல் கவிதைத் தொகுப்பை வெளியிட்டார். அதன் பிறகு, இவரது புகழ் பரவியது. 1945-ல் உருதுப் பத்திரிகைகளின் ஆசிரியராகப் பணியாற்றினார்.

* கம்யூனிச சித்தாந்தத்தில் நம்பிக்கை கொண்டவர். பத்திரிகையில் எழுச்சிக் கட்டுரைகள் எழுதினார். 1949-ல் பாகிஸ்தான் அரசு கைது வாரன்ட் பிறப்பித் ததால், லாகூரில் இருந்து தப்பி டெல்லிக்கு வந்தார். சிறிது காலத்துக்குப் பிறகு மும்பையில் பத்திரிகை ஆசிரியராகப் பணியாற்றினார். இந்தி படங்களில் பாடல்கள் எழுதத் தொடங்கினார்.

* முதன்முதலாக இவரது பாடல் இடம் பெற்ற திரைப்படம் ‘ஆஸாதி கி ராஹ் பர்’ (1949). எஸ்.டி.பர்மன் இசையில் வந்த ‘நவ்ஜவான்’ (1951) படத்தில் வரும் ‘தண்டி ஹவாயே லெஹரா கே ஆயே’ பாடல் மூலம் மிகவும் பிரபலமானார்.

* தொடர்ந்து, பல்வேறு படங்களுக்கு காலத்தால் அழி யாத உயிரோட்டமான பல பாடல்களை எழுதினார். இயக்குநர்கள், இசை அமைப்பாளர்கள் விரும்பும் பாடலாசிரியராகத் திகழ்ந்தார். இறைவன், அழகு, மதுவைப் புகழ்ந்து எழுதுவதில்லை என்பதை கொள்கையாகவே வைத்திருந்தார்.

* தனித்துவம் வாய்ந்த இவரது பாடல் வரிகளில் வாழ்வின் துயரங்கள், அர்த்தமற்ற போர்கள், அரசியல் செயல்பாடு கள் குறித்து இருக்கும். பொதுவாக இசைக்குப் பாட்டு எழுதுவது இவருக்குப் பிடிக்காது.

* இவரைப் பற்றி இந்தியா, பாகிஸ்தானில் பல புத்தகங் கள் வெளிவந்துள்ளன. டேனிஷ் இக்பால் எழுதிய ‘மை சாஹிர் ஹூ’ என்ற புத்தகம் இவரது வாழ்க்கை மற்றும் படைப்புகள் பற்றி விரிவாக எடுத்துக் கூறும் ஆராய்ச்சிப் புத்தகமாக விளங்கியது. 2010-ல் ‘சாஹிர்’ என்ற மேடை நாடகத்தை இக்பால் எழுதினார். பெரும் வெற்றி பெற்ற இந்த நாடகம், டெல்லியில் பலமுறை அரங்கேறியது.

* வானொலியில் பாடல்கள் ஒலிபரப்பப்படும்போது பாட கர், இசை அமைப்பாளருடன் பாடலாசிரியர் பெயரை யும் சேர்த்துக் கூறும் வழக்கம் இவரது முயற்சியால்தான் தொடங்கியது.

* பாடல்களுக்கு ராயல்டி பெற்ற முதல் பாடலாசிரியர் இவர். தனக்கு சரி என்று படுவதை பளிச்சென்று சொல்வார், துணிச்சலுடன் செய்வார். மக்கள் கவிஞ ராகப் போற்றப்பட்ட சாஹிர் லுதியான்வி 59 வயதில் (1980) மறைந்தார்.