ஸ்ரீ நாராயண குரு 10

* கேரள மாநிலம் செம்பழஞ்சி என்ற சிற்றூரில் தீண்டத்தகாதவர்கள் என புறக்கணிக்கப்பட்ட சமுதாயத்தில் பிறந்தார் (1856). பிறந்த ஊரிலேயே கல்வி கற்றார். அப்போதே அய்யாவு ஆசான் என்ற ஹடயோகியிடம் யோகம் கற்றார். ஆன்மிகத்தில் நாட்டம் பிறந்தது.

* 23-வது வயதில் ஊரைவிட்டு வெளியேறி, தமிழ்நாட்டுக்கு வந்து துறவு பூண்டார். வேதங்கள், உபநிடதங்கள், புராணங்கள், அறுவகை மந்திரங்கள், பவுத்த, சமண மரபுகள், மூவகை வேதாந்தங்கள், இந்திய, வெளிநாட்டு தத்துவங்கள் ஆகியவற்றை கற்று நிபுணத்துவம் பெற்றார்.

* 1888-ல் அருவிக்கரை என்ற சிற்றூரில் குருகுலம் நிறுவினார். ஏழை, அநாதைக் குழந்தைகளுக்குப் பல இடங்களில் பள்ளிகளை நிறுவினார். அவர்களுக்கு சமஸ்கிருதம், யோகா கற்றுத் தந்தார். திருச்சூர், கண்ணூர், தலச்சேரி, கோழிக்கோடு, மங்களூர் உள்ளிட்ட பல இடங்களில் இவரது மேற்பார்வையில் கோயில்கள் கட்டப்பட்டன.

* நாடு முழுவதிலுமிருந்து ஏராளமான சீடர்கள் இவரை நாடி வந்தனர். தன் சீடர்களை ஒன்று சேர்த்து ‘தர்ம சங்கம்’ என்ற அமைப்பை உருவாக்கினார். 1913-ல் அத்வைத ஆசிரமம் தொடங்கினார். இது ‘ஓம் சோதர்யம் சர்வத்ர’ (உலகளாவிய சகோதரத்துவம்) கோட்பாட்டைப் பின்பற்றியது.

* ஆன்மிகவாதி, சமூக சீர்திருத்தவாதி, சொற்பொழிவாளர், கல்வியாளர் என்பதோடு நல்ல எழுத்தாளராகவும் மிளிர்ந்தார். 1897-ல் மலையாளத்தில் இவர் இயற்றிய ‘ஆத்மோபதேச சதகம்’ சிறந்த இலக்கியமாகவும், இவரது தலைசிறந்த தத்துவ நூலாகவும் போற்றப்பட்டது. ‘சுப்ரமணிய சதகம்’, ‘ஜாதி நிர்ணயம்’, ‘தோத்திரப்பாடல்கள்’, ‘தரிசன மாலா’, ‘வேதாந்த சூத்திரம்’, ‘தர்மம்’, ‘தேவாரப் பதிகங்கள்’ உள்ளிட்ட நூல்களைப் படைத்தார்.

* இவரது சீர்திருத்த கொள்கைகளின் விளைவாக உருவானதுதான் ஸ்ரீ நாராயண தர்ம பரிபாலன சபை. மகாத்மா காந்தி இவரை ‘அவதார புருஷர்’ எனப் போற்றினார். பாரதியார் இவருடைய சமூக சீர்திருத்தக் கொள்கைகளையும், சமஸ்கிருத படைப்பு களையும் வெகுவாகப் பாராட்டியுள்ளார்.

* அனைவரும் அறிவை அடைய வேண்டும் என்றும் அதற்கு எந்தக் குறுக்கு வழிகளும் கிடையாது என்றும் இவர் கூறுவார். அனைத்தையும் கற்றுத் தேர்ந்த பின்னர் தனக்கென ஒரு நோக்கத்தை உருவாக்கிக்கொள்ள வேண்டும் என்றார்.

* இவரது தத்துவங்கள், கோட்பாடுகள் குறித்து இவர் படைத்த பெரும்பாலான நூல்கள் ஆங்கிலத்தில் மொழிபெயர்க்கப்பட்டுள்ளன. சொற்பொழிவுகள் தொகுக்கப்பட்டு நூல்களாக வெளியிடப்பட்டன. இவரது தத்துவங்கள், கோட்பாடுகள், கொள்கைகள் குறித்து கேரளாவில் உள்ள பல பல்கலைக்கழகங்களிலும், வேறு சில பல்கலைக்கழகங்களிலும் ஆய்வுகள் மேற்கொள்ளப்பட்டன.

* பல மாணவர்கள் முனைவர் பட்டமும், ஆய்வியல் நிறைஞர் (M.Phil.) பட்டமும் பெற்றுள்ளனர். ‘அனைத்தும் ஒன்றே’ என்ற கோட்பாட்டை உருவாக்கினார். ‘இரண்டாம் புத்தர்’, ‘இந்திய சமூகச் சீர்திருத்தவாதி’, ‘ஆன்மிகத்தில் பல புதுமைகளைக் கொண்டு வந்தவர்’ என எல்லோராலும் போற்றப்பட்டார்.

* சிறந்த இலக்கியப் படைப்பாளி, தத்துவஞானி என்றெல்லாம் போற்றப்பட்டவருமான ஸ்ரீ நாராயண குரு 1928-ம் ஆண்டு தனது 72-வது வயதில் மகா சமாதி அடைந்தார். இவரது நினைவாக இந்திய அரசு தபால் தலை வெளியிட்டது. இவரது பிறந்த நாள், மகா சமாதி அடைந்த நாள் இரண்டுமே கேரளாவில் பொதுவிடுமுறை நாட்களாக அறிவிக்கப்பட்டுள்ளன.