சர் வில்லியம் ரேண்டல் கிரெமர் 10

நோபல் பெற்ற இங்கிலாந்து தொழிற்சங்கவாதி

இங்கிலாந்து நாட்டின் தொழிற்சங்கத் தலைவரும் அமைதிக்கான நோபல் பரிசை வென்றவருமான சர் வில்லியம் ரேண்டல் கிரெமர் (Sir William Randal Cremer) பிறந்த தினம் இன்று (மார்ச் 18). அவரைப் பற்றிய அரிய முத்துக்கள் பத்து:

* தென் இங்கிலாந்தில் ஃபேர்ஹம் என்ற நகரில் பிறந்தவர் (1828). தந்தை, குடும்பத்தைக் கைவிட்டதால், இரண்டு மூத்த சகோதரிகளையும் இவரையும் அம்மா வளர்த்து வந்தார். சொந்த ஊரில் பள்ளியில் பயின்றார். ஆனால், வறுமை காரணமாக, 12 வயதில் கல்வியைக் கைவிட நேர்ந்தது.

* கட்டுமானப் பணியாளராக வேலை செய்தார். வேலை செய்துகொண்டே, பல்வேறு இடங்களில் நடைபெற்ற இலவச விரிவுரைகளில் பங்கேற்றுத் தன் அறிவைப் பட்டை தீட்டிக்கொண்டார். அந்தச் சந்தர்ப்பங்களில் போரிடும் நாடுகளில் அமைதியை நிலைநாட்டுவது குறித்த விரிவுரை இவரது மனதில் தாக்கத்தை ஏற்படுத்தியது.

* இது பிற்காலத்தில் இவரது வாழ்க்கையின் முக்கிய இலக்காக மாறியது. வேலை தேடி லண்டன் சென்றார். பேச்சாற்றலும் எழுத்தாற்றலும் கொண்டிருந்த இவரிடம் அசாதாரணத் தலைமைப் பண்புகள் இயல்பாகக் குடிகொண்டிருந்தன. லண்டனில் செயல்பட்டு வந்த தொழிற்சங்க அமைப்பின் பணிகளில் ஆர்வத்துடன் பங்கேற்றார்.

* விரைவில் தச்சர்கள் சங்கத்தின் தேசியத் தலைவராகவும் லண்டன் வர்த்தகக் கவுன்சிலின் உறுப்பினராகவும் தேர்ந்தெடுக்கப்பட்டார். 1865-ல் சர்வதேச தொழிலாளர் சங்கத்தின் செயலராக நியமிக்கப்பட்டார்.

* அன்றைய பல்வேறு சர்வதேசப் பிரச்சினைகள், அமெரிக்க உள்நாட்டுப்போர், போலந்து நாட்டினரின் ரஷ்யாவுக்கு எதிரான கிளர்ச்சிகள் உள்ளிட்ட பல நிகழ்வுகள் குறித்த பிரச்சாரங்களிலும் முக்கியப் பங்காற்றினார். தேசங்களுக்கு இடையேயான சர்ச்சைகளைத் தீர்த்துக்கொள்ள சர்வதேச நடுவர் அமைப்பு (arbitration) நிறுவப்பட வேண்டும் என்று வலியுறுத்தினார்.

* பிரான்ஸ் - பிரெஷ்யன் யுத்தம் மூண்டபோது, இதில் பிரிட்டனின் தலையீடு கூடாது என்பதற்கான ‘சமாதானக் குழு’ 1870-ல் கூடியது. இதன் பொதுச் செயலாளராக இவர் நியமிக்கப்பட்டார். இந்தக் குழு அதே ஆண்டு இறுதியில் தொழிலாளர்கள் அமைதி அமைப்பாக மாறியது (Workmen's Peace Association-WPA). அனைத்து சர்வ தேசப் பிரச்சினைகளுக்கும் மத்தியஸ்தம் மூலம் தீர்வு காண்பதையும் சர்வதேச நாடுகளின் உயர் நீதிமன்றம் அமைப்பதையும் தன் இலக்காக இந்த அமைப்பு அறிவித்தது.

* 1885-ல் லிபரல் கட்சி சார்பாக தேர்தலில் போட்டியிட்டு நாடாளுமன்ற உறுப்பினரானார். அனைவருக்கும் கட்டாயக் கல்வி, நேரடி வரி முறை, நிலச் சட்டங்களில் சீர்திருத்தங்கள் மற்றும் தொழிற்சங்க சட்ட திருத்தங்களுக்காகக் குரல் கொடுத்தார்.

* டபிள்யு.பி.ஏ. அமைப்பு சர்வதேச நடுவர்மன்ற லீக் (International Arbitration League) என பெயர் மாற்றம் செய்யப்பட்டது. நாடு முழுவதும் இந்த அமைப்பு விரிவடைந்தது. உலக நாடுகளிடையே போர் மூள்வதைத் தவிர்ப்பதில் இந்த அமைப்பு முன்னின்று செயல்பட்டது.

* 1889-ல் நடைபெற்ற இன்டர்-பார்லிமென்டரி கான்ஃபெரென்ஸ் ஃபார் ஆர்பிட்ரேஷன் மாநாட்டுக்குப் பின்னர் பல்வேறு நாடுகளின் நாடாளுமன்றங்களும் இதில் இணைந்தன. உலக அமைதி மற்றும் நல்லிணக்கத்துக்கான இவரது மகத்தான பங்களிப்புகளுக்காக 1903-ல் அமைதிக்கான நோபல் பரிசு வழங்கப்பட்டது.

* அமைதியும் நல்லிணக்கமும் நிறைந்த மனித நேயம் உலகெங்கும் பரவுவதற்காகத் தன் வாழ்நாள் முழுவதும் பாடுபட்ட, சர் வில்லியம் ரேண்டல் கிரெமர் 1908-ம் ஆண்டு, 80-வது வயதில் மறைந்தார்.