சர் ஹரோல்டு ஜெஃப்ரீஸ் 10

பிரிட்டன் அறிவியலாளர்

பிரிட்டனைச் சேர்ந்த அறிவியலாளரும் அறிவியலின் பல்வேறு களங்களிலும் கணிதத்திலும் குறிப்பிடத்தக்கப் பங்களிப்புகளை வழங்கியவருமான சர் ஹரோல்டு ஜெஃப்ரீஸ் (Sir Harold Jeffreys) பிறந்த தினம் இன்று (ஏப்ரல் 22). அவரைப் பற்றிய அரிய முத்துக்கள் பத்து:

* இங்கிலாந்தின் பேட்பீல்ட் என்ற இடத்தில் பிறந்தார் (1891). தந்தை பள்ளித் தலைமை ஆசிரியர். தந்தை பணியாற்றிய பள்ளியில் கல்வி கற்றார். பின்னர் தர்காம் பல்கலைக்கழகத்தின் நியுசேசிலில் இருந்த ஆர்ம்ஸ்டிராங் கல்லூரியில் பயின்றார்.

* 1914-ல் கேம்பிரிட்ஜ் புனித ஜான் கல்லூரியில் ஆய்வு உறுப்பினராக சேர்ந்தார். அங்கு படித்துக்கொண்டி ருந்த போதே வேதியியல் மற்றும் புகைப்படக்கலை குறித்து ஆய்வுகள் மேற்கொண்டு பல பரிசுகளையும் வென்றார்.

* பின்னர் அங்கு வானியல் பேராசிரியராக நியமிக்கப்பட்டார். பல்வேறு கணித ஆராய்ச்சிகளில் ஈடுபடத் தொடங்கினார். இவரது வாழ்நாளில் ஒரு கணித வல்லுநராக அங்கீகரிக்கப்படவில்லை என்றாலும் அதன்பிறகு இவரது நூல்கள், கட்டுரைகளால் இவரது மகத்துவம் வெளிப்பட்டது.

* இயற்பியல், கணிதம் மட்டுமல்லாமல், பல்வேறு நூல்களைப் படித்து பல துறைகளிலும் அறிவைப் பெருக்கிக்கொண்டார். வானியல் ஆராய்ச்சிகளில் ஈடுபட்ட இவர், நான்கு பெரிய கிரகங்களின் வெளிப்புறப் பண்புகளையும் அவற்றின் கட்டமைப்புகளையும் விவரித்தார்.

* சூரியக் குடும்பத்தின் தோற்றம் மற்றும் அட்சரேகை மாறுபாடு குறித்த கோட்பாடுகளையும் உருவாக்கினார். தனது மனைவியுடன் இணைந்து ‘மெத்தட்ஸ் ஆஃப் மேதமெடிக்கல் ஃபிசிக்ஸ்’ என்ற நூலை 1940-ல் எழுதினார். மேலும், ‘எர்த்’, ‘இட்ஸ் ஆரிஜின்’, ‘ஹிஸ்டரி அன்ட் ஃபிசிகல் கன்ஸ்ட்டிட்யூஷன்’, ‘தி ஃப்யூச்சர் ஆஃப் தி எர்த்’, ‘சயின்டிஃபிக் இன்ஃபெரென்ஸ்’ உள்ளிட்ட பல நூல்களை எழுதியுள்ளார்.

* பல்வேறு இதழ்களில் வெளிவந்த இவரது புவியியல், அறிவியல் கட்டுரைகள் தொகுக்கப்பட்டு 1971 முதல் தொடர்ந்து 6 ஆண்டு காலம் ஆறு தொகுதிகளாக ‘தி கலெக்டட் பேப்பர்ஸ் ஆஃப் சர் ஹரோல்டு ஜெஃப்ரீஸ்’ என்ற தலைப்பில் நூலாக வெளியிடப்பட்டன.

* நீர்மநிலையில் புவி அகடு (planetary core) அமைகிறது என்ற கருத்துருவை முதலில் எடுத்துக் கூறியவர் இவர்தான். பருவகாலங்களின் தோற்றம் மற்றும் கடற்காற்று ஆகியவற்றையும் விளக்கினார். மேலும் சூறாவளிகள் வளிமண்டலத்தின் பொதுவான சுழற்சிக்கு எவ்வாறு இன்றியமையானவை என்பதையும் எடுத்துக் கூறினார்.

* அதிர்வு அலை பரவல் கோட்பாடுகள், புவி அச்சின் பிறழ்வுகள் மற்றும் வெப்பச்சலனம் குறித்தும் விளக்கினார். இவரது நிகழ்தகவு கோட்பாடு குறித்த நூல் இன்றும் கணிதவியலாளர்களால் பயன்படுத்தப்படுகிறது. இது பாயேசியன் கண்ணோட்டத்துக்கு (Bayesian view) புத்துயிர் அளிப்பதில் பெரும்பங்காற்றியது.

* மேலும், 1924-ல் ஷ்ரோடிங்கர் சமன்பாடு உட்பட இரண்டாவது வரிசை நுண்ணெண் சமன்பாடு, நேரியல் சமன்பாடு ஆகியவற்றுக்கான தீர்வுகளைத் தோராயமாக்கும் பொதுவான ஒரு வழிமுறையை வகுத்துத் தந்தது. 1953-ல் சர் பட்டம் பெற்றார். ராயல் வானியல் கழகத்தின் தங்கப் பதக்கம், ராயல் சொசைட்டியின் காப்ளே பதக்கம், ராயல் ஸ்டாடிஸ்டிகல் சொசைட்டியின் தங்கப் பதக்கம் உள்ளிட்ட பல பரிசுகளைப் பெற்றார்.

* சர்வதேச நில அதிர்வு பதிவுத்தகவல் மையத்தின் தலைவராகவும் செயல்பட்டார். இறுதிவரை ஆராய்ச்சிகளில் ஈடுபட்டும், எழுதியும் வந்த பல்துறை வல்லுநரான சர் ஹரோல்டு ஜெஃப்ரீஸ் 1989-ம் ஆண்டு 98-வது வயதில் மறைந்தார்.