ஜெயப்பிரகாஷ் நாராயண் 10

நாட்டுக்காக உழைத்த மக்கள் தலைவர் (லோக் நாயக்)

நாட்டுக்காகத் தன்னை முழுமையாக அர்ப்பணித்த தேசபக்தர் ஜெயப்பிரகாஷ் நாராயண் பிறந்தநாள் இன்று. அவரைப் பற்றிய அரிய முத்துக்கள் பத்து...

# பிஹார் மாநிலத்தில் பிறந்தவர். நாட்டுப் பற்றாளர். தான் படிக்கும் கல்லூரிக்கு ஆங்கில அரசின் நிதி உதவி கிடைக்கிறது என்று தெரிந்தவுடன், கல்லூரிப் படிப்பையே உதறிய லட்சியவாதி.

# தீவிர சுதேசி. கையால் நெய்த ஆடை, கிராமங்களில் தயாரித்த காலணிகளையே அணிந்தார். காலணியை பாலிஷ் செய்யக்கூட கடுகு எண்ணெயைப் பயன்படுத்திய கறார் பேர்வழி.

# ‘வெள்ளையனே வெளியேறு’ போராட்டத்தில் கைதானவர், சிறையில் இருந்து தப்பி நேபாளம் சென்றார். அங்கு ‘ஆசாத் தாஸ்தா’ விடுதலைப் படையைத் திரட்டும்போது மீண்டும் கைது செய்யப்பட்டார்.

# மார்க்சியக் கொள்கைகளில் அதிக ஈடுபாடும் பற்றும் கொண்டவர். ராம் மனோகர் லோகியா, அசோக் மேத்தா, மினு மசானி ஆகியோருடன் இணைந்து ஆச்சார்ய நரேந்திரதேவ் தலைமையில் காங்கிரஸ் சோஷலிஸ்ட் கட்சியை நிறுவினார்.

# நாடு சுதந்திரம் பெற்ற பிறகுகூட, அதிகாரம் தரும் பதவி எதையும் இவர் விரும்பவில்லை. இவர் தொடங்கிய பிரஜா சோஷலிஸ்ட் கட்சி, காங்கிரஸின் எதிர்க்கட்சியாகச் செயல்பட்டது.

# பிஹார், குஜராத் மாநிலங்களில் ஊழலுக்கு எதிராக இளைஞர்கள், மாணவர்கள் இணைந்து உருவாக்கிய ‘சத்ர யுவ பரிஷத்’, ‘சத்ர சங்கர்ஷ சமிதி’ ஆகிய இயக்கங்களை ஆதரித்தார்.

# இந்திரா காந்தியின் சர்வாதிகார ஆட்சியை எதிர்த்து நாடு முழுவதும் ‘முழுப் புரட்சி’ இயக்கம் தொடங்க அறைகூவல் விடுத்தார். அரசின் உத்தரவை ராணுவம் ஏற்கக்கூடாது என்று கூறியதற்காக கைது செய்யப்பட்டார்.

# பிரஜா சோஷலிஸ்ட், பாரதிய லோக் தளம், ஸ்தாபன காங்கிரஸ், சுதந்திரா, பாரதிய ஜனசங்கம் உள்ளிட்ட எதிர்க்கட்சிகளை ஒன்றிணைத்து இவர் உருவாக்கியதுதான் ஜனதா கட்சி.

# மக்களுடைய சிவில் உரிமைகள், ஜனநாயக உரிமைகளைக் காப்பதற்காக பி.யு.சி.எல்.டி.ஆர். என்ற மனித உரிமை இயக்கத்தை 1976-ல் தொடங்கினார்.

# மனைவி பிரபாவதி தேவி. இவரும் காந்தியவாதி. எங்கே, குழந்தை பிறந்தால் பொதுத் தொண்டுக்கு இடையூறாக இருக்குமோ என்று எண்ணி குழந்தையே பெற்றுக்கொள்ளவில்லை இத்தம்பதி.