இன்று பிறந்​தநாள்: உத்​தம்​சிங்​கின் உயிர்த் தியாகம்

ஆயிரக்​கணக்கான பேர் சுட்டுக் கொல்​லப்​பட்ட ஜாலியன்​வாலா பாக் படுகொலைக்கு காரணமான பஞ்சாப் மாகாண ஆளுநர் மைக்​கேல் ஓட்வியரை 21 ஆண்டுகள் காத்​திருந்து, அவரது சொந்த நாட்​டிலேயே சுட்டுக் கொன்ற மாவீரன்​தான் உத்தம்​சிங்.

பஞ்சாப் மாநிலம் சாங்​ரூர் மாவட்​டத்​தில் உள்ள சுனம் என்ற ஊரில் கடந்த 1899 டிசம்பர் 26-ம் தேதி பிறந்​தார் உத்தம்​சிங். 7 வயதில் தாய் - தந்தையரை இழந்​தார். ஆதரவற்​றோர் இல்லத்​தில் அண்ணனுடன் வளர்ந்​தார். தனது 18 வயதில் ஒரே அண்ணனை​யும் இழந்​தார். பிறகு, அமிர்​தசரஸில் உள்ள ஜாலியன்​ வாலா பாக் அருகே பெட்​டிக்கடை வைத்து பிழைப்பு நடத்தி வந்தார்.

1917-ல் ஆங்கிலேயர்​களுக்கு எதிரான வன்முறைகளை ஒடுக்க நீதிபதி சிட்னி ரவுலட் தலைமை​யில் குழு அமைக்​கப்​பட்​டது. அந்த குழு பரிந்​துரை அடிப்​படை​யில், 1919 மார்ச் 18-ம் தேதி ரவுலட் சட்டம் இயற்​றப்​பட்​டது. இச்சட்​டத்​தின்​கீழ் எந்த ஒரு இந்தி​யரை​யும், எந்த காரண​மும் இல்லாமல் கைது செய்து, விசாரணை நடத்​தாமல் 2 ஆண்டு சிறை தண்டனை விதிக்க முடி​யும்.

இதற்கு நாடு முழு​வதும் கடும் எதிர்ப்பு கிளம்​பியது. பஞ்சாப் மாகாணம் அமிர்​தசரஸ் நகரின் ஜாலியன்​வாலா பாக் பகுதி​யில் 1919 ஏப்ரல் 13-ம் தேதி அறுவடை திருநாளாம் பைசாகி நாளில் கண்டன கூட்டம் நடைபெற்​றது. சுமார் 20 ஆயிரம் பேர் கூடி​யிருந்த அந்த இடத்​தில், அனைவருக்​கும் குடிநீர் கொடுத்​தார் உத்தம்​சிங்.

பழி தீர்க்க சபதம்: ஜாலியன்​வாலா பாக்​கில் நாலாபக்​க​மும் வீடு​களின் பின்புற சுவர்கள் இருந்தன. உள்ளே செல்ல 5 மிகக்​குறுகிய சந்துகள். ஒரேயொரு பெரிய சந்து. அதன் வழியே ஒரே நேரத்​தில் 6 பேர் நுழைய​லாம். இதன் வழியாக ஜெனரல் டயர் நுழைந்து, மண் மேடை மீது ஏறி, 10 நிமிடத்​துக்​குள் 1,650 ரவுண்​டுகள் சுட்​டான். இதில் ஏராள​மானோர் உயிரிழந்​தனர். பிணங்​களுக்கு அடியில் கிடந்த 20 வயது உத்தம்​சிங், சிரமப்​பட்டு எழுந்து நின்று கதறி அழுதான். “என் மக்கள் இறப்​புக்கு பழிதீர்ப்​பேன்” என சபதம் ஏற்றான்.

துப்​பாக்​கிச் சூட்​டில் 1,800 பேர் உயிரிழந்​ததாக அமிர்​தசரஸ் மருத்​துவமனை தலைமை மருத்​துவர் சுமித் தெரி​வித்​தார். ஆனால், வெறும் 369 பேர் மட்டுமே தனது துப்​பாக்​கிச் சூட்​டில் இறந்​ததாக ஜெனரல் டயர் அறிக்கை அனுப்​பினார். இந்த துப்​பாக்​கிச் சூட்டுக்கு முன்​அனுமதி தராத பஞ்சாப் மாகாண ஆளுநர் மைக்​கேல் ஓட்வியர், அந்த அறிக்கை​யில் Ratified (ஏற்​கப்​பட்​டது) என்ற ஒரு வார்த்​தையை எழுதி, பின்னேற்பு வழங்கிய பாவத்தை செய்​தார்.

மக்கள் கொதித்​தெழுந்​தனர். ஆனால், ஹண்டர் விசாரணை குழு யாரை​யும் தண்டிக்க​வில்லை. ஜெனரல் டயர் இங்கிலாந்​துக்கு பணி மாறுதல் செய்​யப்​பட்​டார் அவ்வளவு​தான். 1919-ல் பணிக்​காலம் முடிந்​த​தால் மைக்​கேல் ஓட்வியர், ஆளுநர் பொறுப்​பில் இருந்து விடுவிக்​கப்​பட்​டதோடு சரி. இந்த கொடுமைகளை பொறுக்காத உத்தம்​சிங், அவர்களை பழிதீர்க்க 1933-ல் இங்கிலாந்து சென்​றார். 1937-ம் ஆண்டு முதல் லண்டன் ஷெப்​பர்ட் புஷ் குருத்​வாரா​வில் இருந்து செயல்​பட்​டார். இடைப்​பட்ட காலத்​தில் பக்கவாத நோயால் ஜெனரல் டயர் காலமானார். அதனால் மைக்​கேல் ஓட்வியரை பழிதீர்க்க காத்​திருந்​தார் உத்தம்​சிங்.

1940 மார்ச் 13-ம் தேதி லண்டன் மாநகர், காக்ஸ்டன் ஹாலில் மைக்​கேல் ஓட்வியரின் நிகழ்ச்சி நடைபெற்​றது. கோட், சூட், வேறொரு​வரின் அடையாள அட்டை, துப்​பாக்கி​யுடன் அங்கு வந்த உத்தம்​சிங், 4-வது வரிசை​யில் காத்​திருந்​தார். மைக்​கேல் ஓட்வியர் பேசி முடித்​ததும், மக்கள் கலையத் தொடங்​கினர். உத்தம்​சிங் கையில் ரிவால்​வருடன் அவரை நெருங்​கினார். தன்னிடம் கைகுலுக்க வருவதாக நினைத்​தார் மைக்​கேல். கொஞ்​ச​மும் தாமதிக்​காமல் மைக்​கேலை சுட்டு வீழ்த்​தினார் உத்தம்​சிங்.

‘தோட்​டாக்கள் மைக்​கேல் ஓட்வியரின் விலா எலும்​புகளை துளைத்து இதயத்​தின் வலதுபக்​கமாக வெளி​யேறியது’ என ‘THE PATIENT ASSASSIN’ (A True Tale of Massacre, Revenge and the Raj) என்ற நூலில் அனிதா ஆனந்த் எழுதி​யுள்​ளார்.

தூக்கு தண்டனை: உத்தம்​சிங் ஓடி ஒளிய​வில்லை. உண்மையை ஒப்புக்​கொண்​டார். சிறை​யில் 41 நாட்கள் உண்ணா​விரதம் இருந்​தார். அவரது வாயில் உணவு திணிக்​கப்​பட்​டது. அவருக்கு தூக்கு தண்டனை விதிக்​கப்​பட்​டது. இந்த தீர்ப்பை கேட்​டதும் மகிழ்ச்​சி​யடைந்​தார். இந்திய மண்ணில் தனது உடல் புதைக்​கப்பட வேண்​டும் என கோரிக்கை வைத்​தார். 1940 ஜூலை 31-ம் தேதி லண்டனின் பென்டோ சிறைச்​சாலை​யில் தூக்​கி​லிடப்​பட்​டார். அங்​கேயே அவரது பு​கழுடல் புதைக்​கப்​பட்​டது. இந்​திய மண்​ணில் தன் உடல் புதைக்​கப்பட வேண்​டும் என்ற அவரது ஆசை 1947-ல் இந்​திய அரசின் நட​வடிக்கை​யால் நிறைவேறியது. இந்​திய சுதந்திர வரலாற்றில் உத்​தம்​சிங்​கின்​ உ​யிர்​த்​தி​யாகம்​ ஈடு இணையற்​றது.

கட்டுரையாளர்: முனைவர் எம்.எஸ். முத்​துசாமி, முன்​னாள் காவல்​துறை தலைவர்