இந்த வார நட்சத்திர பலன்கள் - (டிசம்பர் 23 முதல் 29 வரை) அஸ்வினி, பரணி, கார்த்திகை; எந்தக் கிழமைகளில் என்னென்ன பலன்கள்?

ஜோதிடர் ஜெயம் சரவணன்

அஸ்வினி -

திங்கட்கிழமையைத் தவிர மற்ற அனைத்து நாட்களும் உங்களுக்கு சாதகமாகவும், வெற்றிகரமாகவும் இருக்கும். உங்கள் தேவைகள் அனைத்தும் பூர்த்தியாகும். எண்ணிய செயல்கள் அனைத்தும் இனிதாக முடியும். குடும்பத்தில் மகிழ்ச்சி நிலவும். உங்களுக்கோ அல்லது குடும்ப உறுப்பினர்களில் யாருக்காவது சுப விசேஷ நிகழ்ச்சிகள் நடக்கும்.சொத்து சம்பந்தமான விஷயங்களை எளிதாக பேசி முடிப்பீர்கள்.

உத்தியோகம் -

பணியில் பெரிய மாறுதல் ஏதும் இருக்காது. எதிர்பார்த்த பதவி உயர்வு கிடைக்கும். ஒருசிலருக்கு பதவி உயர்வுடன் கூடிய இடமாற்றம் ஏற்படும். அரசு ஊழியர்களுக்கு கூடுதல் பணிச்சுமை ஏற்படும். அழுத்தங்கள் அதிகரிக்கும். தேவையில்லாத சர்ச்சைகளில் சிக்க வேண்டியது வரும். கவனமாக இருக்க வேண்டும். சிறு நிறுவனங்களில் பணிபுரிபவர்கள் வேறு நிறுவனத்திற்கு மாறும் முயற்சி வெற்றி ஆகும். அதற்கான முயற்சிகளில் இந்த வாரம் இறங்கலாம்.

தொழில் -

தொழிலில் எதிர்பார்த்த உதவிகள் அனைத்தும் கிடைக்கும். பணத்தேவைகள் பூர்த்தியாகும். வியாபார ஒப்பந்தங்கள் ஏற்படும்.கடன்கள் கட்டுக்குள் இருக்கும். ஏற்றுமதி இறக்குமதி தொழில் சிறப்பாக இருக்கும். பங்கு வர்த்தகத் துறையினருக்கு பெரிய பாதிப்புகள் எதுவும் இல்லை. சற்று அதிக கவனம் செலுத்த வேண்டும். வியாபாரிகளுக்கு வியாபாரத்தில் நல்ல வளர்ச்சி இருக்கும். வியாபார நிறுவனத்தை விரிவாக்கும் முயற்சிகள் வெற்றியாகும். ரியல் எஸ்டேட் மற்றும் கட்டுமானத் தொழிலில் இருப்பவர்களுக்கு மிகச் சிறந்த வளர்ச்சி மற்றும் வருமானம் இருக்கும்.

பெண்களுக்கு -

குடும்பத்தில் சுப விசேஷ நிகழ்வுகள் நடக்கும். திருமணமாகாத பெண்களுக்கு திருமணம் உறுதியாகும். தந்தைவழி சொத்துக்கள் சுமுகமாகி பாகப்பிரிவினை உண்டாகும்.சுயதொழில் தொடங்குவதற்கான வாய்ப்புகள் உண்டு. தேவையான உதவிகள் கிடைக்கும்.

மாணவர்களுக்கு -

படிப்பில் ஒருவித மந்த நிலை இருக்கும். ஞாபகமறதி அதிகமாக ஏற்படும். படிப்பில் கவனம் செலுத்த முடியாத சூழ்நிலை உருவாகும். இது இந்த வாரத்திற்கு மட்டுமே இருக்கும்.

கலைஞர்களுக்கு-

புதிய ஒப்பந்தங்கள் ஏற்படும். கடந்த சில நாட்களாக இருந்த ஒரு தொய்வு நிலை இனி இருக்காது. எதிர்பார்த்த உதவிகள் கிடைக்கும்.

பொதுப்பலன் -

பாகப்பிரிவினைகளில் விட்டுக்கொடுத்து சென்றால் பெரிய பாதிப்புகள் ஏதும் இருக்காது. பிடிவாதமாக இருந்தால் வழக்குகள் உண்டாகும். தந்தையின் உடல் நலத்தில் அதிக அக்கறை, கவனம் செலுத்த வேண்டும். புதிய தொழில் தொடங்கும் ஆர்வம் ஏற்படும். சுய ஜாதகத்தில் தசாபுத்தி சாதகமாக இருந்தால் சொந்தத் தொழில் தொடங்கலாம். உடல்நலத்தில் ஒருசிலருக்கு நரம்பு சம்பந்தப்பட்ட சிறு பிரச்சினைகள் வரலாம். தலைவலி மற்றும் முதுகெலும்பு தொடர்பான சிறு பிரச்சினைகள் ஏற்பட வாய்ப்பு உண்டு.

இந்த வாரம் -

திங்கள் -
சந்திராஷ்டம தினம். எனவே பொறுமை நிதானம் தேவை. பணம் சம்பந்தப்பட்ட விஷயங்களில் கவனமாக இருக்க வேண்டும். தொலைதூரப் பயணங்களைத் தவிர்க்க வேண்டும்.

செவ்வாய் -
பாதியில் நின்ற வேலைகள் அனைத்தையும் இன்று செய்து முடிப்பீர்கள். பேச்சுவார்த்தைகள் சுமூக நிலையை எட்டும். பணத்தேவைகள் பூர்த்தியாகும்.

புதன் -
எதிர்பார்த்த வியாபார ஒப்பந்தங்கள் ஏற்படும். ஆதாயம் தரும் விஷயங்கள் சாதகமாக இருக்கும். வெளிநாடு செல்லும் முயற்சி வெற்றியாகும். வீட்டுக் கடன் அல்லது தொழில் சார்ந்த வங்கிக் கடன் கிடைப்பதற்கான வாய்ப்புகள் உள்ளன.சொத்து சம்பந்தமான விஷயங்கள் சுமுகமாக முடியும்.

வியாழன் -
நீண்ட நாளாக எதிர்பார்த்த உதவி இன்று கிடைக்கும். வியாபாரம் தொடர்புடைய ஒப்பந்தம் இன்று போடப்படும். சுப விசேஷப் பேச்சுக்கள் இனிதாக முடியும்.

வெள்ளி -
திட்டமிட்ட காரியங்கள் திட்டமிட்டபடியே செய்து முடிப்பீர்கள். எடுத்த காரியங்கள் அனைத்திலும் முழு வெற்றி கிடைக்கும். எதிர்பார்த்த பணவரவுகள் அனைத்தும் கிடைக்கும். வியாபாரம் மற்றும் தொழில் தொடர்புடைய அனைத்து விஷயங்களும் இன்று சாதகமாக இருக்கும்.

சனி-
உங்களுக்கு சம்பந்தமில்லாத ஒரு பயணம் ஏற்படும். அலைச்சல் அதிகரிக்கும். உடலில் சோர்வு ஏற்படும். வீண் செலவுகள் உண்டு.

ஞாயிறு -
சுப விசேஷங்கள் பேசி முடிக்கப்படும். சொத்து சம்பந்தமான விஷயங்கள் சாதகமாக இருக்கும். வியாபார ஒப்பந்தங்கள் இன்று முடிவாகும். லாபகரமான நாளாக இருக்கும்.

வணங்க வேண்டிய தெய்வம் -

முருகப் பெருமானை வணங்குங்கள். சண்முகக் கவசம் பாராயணம் செய்யுங்கள். நன்மைகள் கூடுதலாகும், தேவைகள் உடனுக்குடன் பூர்த்தியாகும்.
*******************************************************
பரணி -
முயற்சிகளில் முழு வெற்றி கிடைக்கும்.தேவையான உதவிகள் கிடைக்கும். பணவரவு எதிர்பார்த்த மாதிரியே இருக்கும். திருமண முயற்சிகள் கைகூடும். சொந்த வீடு வாங்கும் கனவு இப்பொழுது நனவாகும். அதற்கான முயற்சிகளில் இறங்கினால் வெற்றி நிச்சயம். தந்தையின் உடல் நலத்தில் அக்கறை காட்ட வேண்டும். தேவையான மருத்துவ சிகிச்சைகளை முறையாக மேற்கொள்ள வேண்டும்.

உத்தியோகம் -
அலுவலகத்தில் பெரிய மாற்றங்கள் ஏதும் இருக்காது. பதவி உயர்வு எதிர்பார்த்தவர்களுக்கு இப்பொழுது பதவி உயர்வு கிடைக்கும். வேறு நிறுவனங்களுக்கு மாறும் முயற்சி எடுத்தவர்களுக்கு முயற்சியில் இந்த வாரம் சாதகமான தகவல் கிடைக்கும். சக ஊழியர்கள் சிறப்பான ஒத்துழைப்பு தருவார்கள். அரசு ஊழியர்களுக்கு வேலையில் அதிக அழுத்தங்களையும், ஒருசில பிரச்சினைகளையும் சந்திக்க வேண்டியது வரும். உங்கள் கடமையில் கண்ணும் கருத்துமாக இருக்க வேண்டும். கடைகள் வணிக நிறுவனங்களில் பணிபுரிபவர்களுக்கு பெரிய மாறுதல் ஏதும் இல்லை.

தொழில் -
தொழிலில் எதிர்பார்த்த அனைத்து உதவிகளும் கிடைக்கும். தொழிலுக்குத் தேவையான பண உதவிகள் கிடைக்கும். தொழிலில் இருந்த மந்தநிலை மாறி சுறுசுறுப்புக்கு மாறும். வெளிநாடு தொடர்பு உடைய தொழில் செய்பவர்களுக்கு புதிய ஒப்பந்தங்கள் கிடைக்கும். தகவல் தொழில்நுட்பத்துறை தொழில் செய்பவர்களுக்கு நெருக்கடிகளிலிருந்து வெளியே வருவீர்கள். தேவையான தொழில் ஒப்பந்தங்கள் ஏற்படும். வரவேண்டிய பாக்கிகள் இப்பொழுது வந்து சேரும். வியாபாரிகள் வியாபாரத்தில் நல்ல வளர்ச்சி காண்பார்கள். புதிய ஏஜென்சி கிடைப்பதற்கான வாய்ப்புகள் உண்டு. ரியல் எஸ்டேட் மற்றும் கட்டுமானத் தொழில் செய்பவர்களுக்கு தங்கள் தொழிலில் நல்ல வளர்ச்சி மற்றும் லாபம் கிடைக்கப் பெறுவார்கள். பங்கு வர்த்தகத் துறையில் இருப்பவர்களுக்கு ஏற்றம் தரும் வாரமாக இருக்கும். இதுவரை உத்தியோகத்தில் இருந்தவர்கள் கூட தொழில் தொடங்குவதற்கான அத்தனை வாய்ப்புகளும் கிடைக்கும்.

பெண்களுக்கு -
கடந்த சில நாட்களாக இருந்த பிரச்சினைகள் இந்த வாரம் நல்ல முடிவுக்கு வரும். கடன் பிரச்சினைகள் முழுமையாகத் தீரும். திருமண முயற்சிகள் கைகூடும். சகோதரர் வழியில் இருந்த சண்டை சச்சரவுகள் நீங்கி சமாதானம் ஏற்படும்.சொத்துக்கள் வாங்குவதற்கான வாய்ப்புகள் உண்டு.

மாணவர்களுக்கு -
கல்வியில் குழப்பமான மனநிலை ஏற்படும். தேர்வுகளில் எதிர்பார்த்த மதிப்பெண்கள் குறையும். இயல்பை விட அதிக முயற்சி இருந்தால் வெற்றி பெறலாம்.

கலைஞர்களுக்கு -
எதிர்பார்த்த ஒப்பந்தம் இந்தவாரம் நிறைவேறும். பணத்தேவைகள் பூர்த்தியாகும். பத்திரிகை மற்றும் ஊடகத் துறையினருக்கு எதிர்பார்த்த சலுகைகள் கிடைக்கும்.

பொதுப்பலன் -
சிறப்பான பலன்கள் ஏற்படும் வாரம். தேவைகள் பூர்த்தியாகும்.எடுக்கின்ற முயற்சிகள் அனைத்தும் வெற்றியாகும். ஒரு சில விஷயங்களில் தாமதம் ஏற்படுவதுபோல் தெரிந்தாலும், முடிவில் நன்மையாகவே இருக்கும்.

இந்த வாரம் -

திங்கள் -
மனதை வருத்திக் கொண்டு இருந்த பிரச்சினைகள் இன்று முடிவுக்கு வரும். மிக முக்கியமான கடன் பிரச்சினை ஒன்று தீரும்.வியாபாரப் பேச்சுவார்த்தைகள் ஒப்பந்தமாக மாறும் வாய்ப்பு உண்டு.

செவ்வாய் -
இன்று சந்திராஷ்டமம். பொறுமையாக இருப்பது நல்லது. மற்றவர்கள் உங்களை கோபப்படுத்தி பார்ப்பார்கள். நிதானம் காக்க வேண்டும்.

புதன் -
மதியத்திற்குப் பிறகு பல நன்மைகள் நடக்கும். எதிர்பார்த்த பணவரவு கிடைக்கும். ஒப்பந்தங்கள் கையெழுத்து ஆகும் .வங்கி தொடர்பான விஷயங்கள் சாதகமாக இருக்கும்.

வியாழன் -
சுப நிகழ்ச்சிகள் சம்பந்தமான பேச்சு வார்த்தைகள் இன்று முடிவடையும். வீடு தொடர்பான விஷயங்கள் சாதகமாக இருக்கும். வியாபாரப் பேச்சுவார்த்தையில் முன்னேற்றம் ஏற்படும். தொழில் தொடர்பாக எதிர்பார்த்த உதவி கிடைக்கும்.

வெள்ளி -
வேலை தொடர்பான இடமாற்றம் ஏற்பட வாய்ப்புண்டு. அல்லது வேலை தொடர்பான பயணம் ஏற்படும்.தரகு சம்பந்தப்பட்ட வியாபாரம் சாதகமாக முடியும்.

சனி-
எதிர்பார்த்த அனைத்து உதவிகளும் கிடைக்கும். வரவேண்டிய பணம் வசூலாகும். வியாபாரத்தில் நல்ல முன்னேற்றமான ஒரு விஷயம் நடக்கும். தொலைபேசி வழியாக வரக்கூடிய செய்தி நன்மையாக இருக்கும்.

ஞாயிறு -
உங்களுக்குச் சம்பந்தமில்லாத வேலைகளில் ஈடுபட வேண்டாம். தேவையற்ற பயணங்களைத் தவிர்க்க வேண்டும். செலவுகள் அதிகமாக இருப்பதால் சிக்கனமாக இருக்க வேண்டும்.

வணங்கவேண்டிய தெய்வம் -
மஹாவிஷ்ணுவுக்கு துளசி மாலை சாற்றி வழிபடுங்கள். ஒன்பது நெய் தீபங்கள் ஏற்றி வழிபடுவது மேலும் சிறப்பைத்தரும். நன்மைகள் அதிகமாகும்.
**********************************************************

கார்த்திகை -
எவ்வளவு பிரச்சினைகள் இருந்தாலும் தேவைகள் பூர்த்தியாகி விடும். முயற்சிகளில் தாமதம் ஏற்பட்டாலும் முடிவு சாதகமாகவே இருக்கும். கடன் தொடர்பான பிரச்சினைகள் கட்டுக்குள் இருக்கும். சகோதரர் வழியில் தேவையில்லாத மன வருத்தங்கள் ஏற்படும்.
நண்பர்களால் சங்கடங்கள் ஏற்படும். உறவினர்களையும் அனுசரித்துச் செல்லவேண்டும். உங்களுக்கு தொடர்பு இல்லாத எந்த பிரச்சினைகளிலும் தலையிட வேண்டாம்.

உத்தியோகம் -
பணியிடத்தில் பெரிய பிரச்சினைகள் எதுவும் இருக்காது. ஆனாலும் சக ஊழியர்களுடன் அனுசரித்துச் செல்லுங்கள். உயர் அதிகாரிகளின் பேச்சுக்கு மதிப்பு கொடுங்கள். வேறு வேலைக்கு மாறும் முயற்சி ஓரளவுக்கு சாதகமாக இருக்கும்.தகவல் தொழில்நுட்பத் துறையில் பணிபுரிபவர்களுக்கு மன அழுத்தம் தரும்படியான பிரச்சினைகள் உருவாகும். எதிர்பார்த்த சலுகைகள் தள்ளிப்போகும். கடைகள் வணிக நிறுவனங்களில் பணிபுரிபவர்களுக்கு பணியிடத்தில் அதிகமாக வேலை வாங்கப்படுவீர்கள். அரசு ஊழியர்கள் தங்கள் கடமையை மட்டும் சரிவர செய்து வந்தால் எந்த பிரச்சினைகளும் வராது.

தொழில் -
தொழிலில் ஒரு சில அரசு நெருக்கடிகள் ஏற்படும். எதிர்பார்த்த சலுகைகள் தள்ளிப்போகலாம். வங்கிக்கடன் எதிர்பார்த்த அளவுக்கு திருப்திகரமாக இருக்காது. வாடிக்கையாளர்கள் அதிருப்தி தெரிவிப்பார்கள். வியாபாரிகளுக்கு ஓரளவுக்கு லாபம் இருக்கும். வரவேண்டிய பாக்கிகள் தாமதமாகும். ஏற்றுமதி இறக்குமதி தொழிலில் இருப்பவர்கள் ஓரளவுக்கு லாபம் பார்ப்பார்கள். எதிர்பார்த்த ஒப்பந்தம் ஏற்பட வாய்ப்பு உண்டு. பங்கு வர்த்தகத்தில் இருப்பவர்கள் சரியான முறையில் முதலீடுகள் செய்ய வேண்டும். ரியல் எஸ்டேட் மற்றும் கட்டுமானத் துறையில் இருப்பவர்களுக்கு ஓரளவு பலன் எதிர்பார்க்கலாம்.

பெண்களுக்கு -
சொத்து சம்பந்தமான பிரச்சினைகள் தாமதமாகும். சகோதரர்களிடம் மனக்கசப்பு ஏற்படும்படி செயல்பட வேண்டாம். ஒரு கடனை அடைப்பதற்கு வேறொரு கடன் வாங்க வேண்டிய சூழ்நிலை உருவாகும். செலவுகள் அதிகமாக இருக்கும். ஆரோக்கியத்தில் சிற்சில பிரச்சினைகள் வரும். மருத்துவச் செலவுகள் உண்டு.

மாணவர்களுக்கு -
கல்வியில் கடும் நெருக்கடி ஏற்படும். படிப்பில் கவனம் செலுத்த முடியாத சூழ்நிலை உருவாகும். குடும்ப பிரச்சினைகள், பொருளாதாரப் பிரச்சினைகள் போன்றவற்றால் கல்வியில் முழு கவனத்தையும் செலுத்த முடியாத நிலை ஏற்படும்.

கலைஞர்களுக்கு -
பொறுமை மிக அவசியம். ஒரு சில வாய்ப்புகள் ஏற்பட வாய்ப்பு இருக்கின்றன. அதுவும் கடும் முயற்சியில் தான் கிடைக்கும்.பொருளாதாரப் பிரச்சினைகள் ஓரளவுக்குத் தீரும்.

பொதுப்பலன் -
ஆரோக்கியத்தில் அதிக அக்கறை காட்ட வேண்டும். அடுத்தவர்கள் பிரச்சினைகளில் தலையிடாமல் இருப்பது நல்லது. ஒரு சிலருக்கு கண் தொடர்பான பிரச்சினைகள், தொண்டை வலி, பின் மண்டையில் வலி போன்றவை ஏற்படும்.

இந்த வாரம் -

திங்கள் -
எதிர்பார்த்த ஒப்பந்தங்கள் தள்ளிப் போகும். பேச்சுவார்த்தைகள் நீண்டுகொண்டே போகும். சந்திக்க வேண்டிய நபர்களை சந்திக்க முடியாமல் போகலாம்.

செவ்வாய் -
கடன் சம்பந்தப்பட்ட ஒரு பிரச்சினை தீர்வதற்கு வழி கிடைக்கும். எதிர்பார்த்த ஒப்பந்தங்கள் ஏற்படும். வேறு வேலைக்கு மாற எடுத்த முயற்சியில் இன்று சாதகமான தகவல் கிடைக்கும்.

புதன் -
உங்களுக்கு எந்த வகையிலும் சம்பந்தமில்லாத பிரச்சினைகளில் தலையிட வேண்டாம். அலுவலகத்திலும், தொழில் செய்யும் இடத்திலும் பொறுமையையும், நிதானத்தையும் கடைபிடிப்பது அவசியம். கடன் கொடுப்பதும் வாங்குவதும் கூடாது.

வியாழன் -
சந்திராஷ்டமம். எனவே கவனமாக இருக்க வேண்டும். பயணங்களைத் தவிர்க்க வேண்டும். பேச்சுவார்த்தை கூடாது. ஒப்பந்தங்கள் போடக்கூடாது. பணம் சம்பந்தப்பட்ட விஷயங்களில் அதிக கவனம் தேவை.

வெள்ளி -
எதிர்பார்த்த தகவல் இன்று கிடைக்கும். அது உங்களுக்கு சாதகமாக இருக்கும். பண உதவிகள் கிடைக்கும். குடும்பத்தினர் தேவைகளை பூர்த்தி செய்து தருவீர்கள்.

சனி-
அலுவலகம் தொடர்பாக அல்லது வியாபாரம் தொடர்பான பயணம் ஒன்று ஏற்படும். அந்த பயணத்தால் ஆதாயம் கிடைக்கும். நீண்ட நாள் நண்பர் ஒருவரை இன்று சந்திப்பீர்கள்.

ஞாயிறு -
எதிர்பார்த்த அனைத்து உதவிகளும் கிடைக்கும். வியாபார பேச்சுவார்த்தைகள் ஒப்பந்தமாகும். தொழில் தொடர்பான முக்கிய நபரை சந்தித்து ஆதாயம் பெறுவீர்கள். எடுத்த காரியங்கள் அனைத்திலும் முழு வெற்றி கிடைக்கும்.

வணங்கவேண்டிய தெய்வம் -
யோக நரசிம்மர் வழிபாடு நன்மைகள் தரும். நரசிம்ம ஸ்தோத்திரம் படியுங்கள் அல்லது கேளுங்கள். பிரச்சினையின் வீரியம் குறையும். நன்மைகள் அதிகமாகும்.
*********************************************************************