ஆஸ்திரேலியாவில் வணிக வளாகத்தில் விமானம் மோதி விபத்து: 5 பேர் பலி

ஆஸ்திரேலியாவில் விமான நிலையத்தின் அருகே அமைந்திருந்த வணிக வளாகத்தின் மீது விமானம் மோதி விபத்துக்குள்ளானதில் 5 பேர் பலியாகினர்.

இந்த விபத்து குறித்து விக்டோரியா போலீஸ் தரப்பில், "ஆஸ்திரேலியாவின் மெல்போர்ன் விமான நிலையத்தில் இன்று (செவ்வாய்க்கிழமை) பீச்கிராப்ட் என்ற விமானம் அருகேவுள்ள வணிக வளாகத்தில் மோதியது. இதில் விமானத்திலிருந்த 5 பேர் பலியாகினர். வணிக வளாகத்தின் பெரும் பகுதி சேதமடைந்துள்ளது. தீயணைப்பு வீரர்கள் கடுமையாக போராடி தீயை கட்டுப்பாட்டுக்குள் கொண்டு வந்தனர்" என்று கூறப்பட்டுள்ளது.

இந்த விபத்தை நேரில் பார்த்த கார் ஓட்டுநர் ஏபிசி வானொலிக்கு கூறும்போது, "அந்த சிறிய விமானம் கட்டுப்பாடற்ற வேகத்தில் வணிக வளாகத்தின் மீது மோதியது. இதனால் பெரிய நெருப்பு பந்துகள் உருவாகின. அதனால் உண்டான வெப்பம் எனது கார் வரை பரவியது" என்றார்.

இந்த விபத்து குறித்து ஆஸ்திரேலிய போலீஸார் வழக்கு பதிவு செய்து விசாரணை நடத்தி வருகின்றனர்.