வியட்நாமில் புதினை ட்ரம்ப் சந்திக்கப் போவதில்லை: வெள்ளை மாளிகை

 வியட்நாமில் நடைபெறும் ஆசிய பசிபிக் உச்சி மாநாட்டில் அமெரிக்க அதிபர் ட்ரம்ப், ரஷ்ய அதிபர் புதினை சந்திக்க இருப்பதாக வெளியான செய்தியை வெள்ளை மாளிகை மறுத்துள்ளது.

ட்ரம்ப் 11 நாட்கள் ஆசிய நாடுகளுக்கு சுற்றுப்பயணம் செல்ல இருக்கிறார். இப்பயணத்தில் ஜப்பான், தென்கொரியா, சீனா, வியட்நாம், பிலிப்பைன்ஸ் ஆகிய நாடுகளுக்கு ட்ரம்ப் பயணம் மேற்கொண்டிருக்கிறார்.

ஜப்பான், தென்கொரியா, சீனா ஆகிய நாடுகளுக்கு சுற்றுப்பயணம் மேற்கொண்ட ட்ரம்ப் தற்போது வியட்நாம் சென்றிருக்கிறார். அங்கு நடைபெறும் ஆசிய பசிபிக் உச்சி மாநாட்டில் கலந்து கொண்டுள்ள ட்ரம்ப் அங்கு ரஷ்ய அதிபர் புதினை சந்திக்க உள்ளதாக தகவல்கள் வெளியாகின. ரஷ்ய ஊடகங்கள் இந்தச் சந்திப்பு குறித்து செய்திகள் வெளியிட்டன.

ஆனால் இந்தத் தகவலை வெள்ளை மாளிகை மறுத்துள்ளது.

இதுகுறித்து அமெரிக்க வெளியுறவுத் துறை அமைச்சர் ரெக்ஸ் டில்லர்சன் கூறும்போது, ''ரஷ்ய அதிபர் புதின் உடனான சந்திப்பு குறித்து இன்னும் முடிவு எடுக்கப்படவில்லை. ரஷ்ய அதிபர் புதின் உடன் சந்திப்பு ஏற்படுவதாக இருந்தால் அது அர்த்தமுள்ள சந்திப்பாகதான் இருக்கும்'' என்று கூறினார்.