ஊடக உலா - 30: தமிழை சிதைக்கும் ‘வாய்ஸ் டு டெக்ஸ்ட்’

சர்வதேச தாய்மொழி நாள் அண்மையில் கொண்டாடப்பட்டிருக்கும் சூழலில் ஊடகத்தில் தமிழ் எந்த வகையில் உள்ளது என்று பேசவேண்டிய கட்டாயத்தில் உள்ளோம். மொழியின் முக்கியத்துவத்தை இன்றைய இளைய சமுதாயம் சரியாகக் கையாளவில்லையோ என்ற ஒரு ஏக்கம் இருந்து கொண்டே இருக்கிறது. இன்று ஊடகம் படித்துவரும் மாணவர்கள் மத்தியில் இதனை நன்றாகவே அறிந்து கொள்ள முடிகிறது. அதற்கு மிக முக்கியமான காரணம் கைப்பேசி.

இன்று வாட்சப் மற்றும் பல்வேறு சமூக ஊடகங்களில் பயன்படுத்தும் மொழி பெரும்பாலும் ‘தமிங்கிலீஸாக’ உள்ளது. எழுத்து இல்லாத மொழிகள் எத்தனையோ உள்ளன. அந்த மொழியைப் பயன்படுத்தும் மக்கள், தமக்கென்று ஒரு தனித்துவமான எழுத்து இல்லையே என வருத்தப்பட்டுக் கொண்டு இருக்கும் அதே சமயத்தில்தான் நாம், நம் மொழியை சிதைத்துக் கொண்டிருக்கிறோம்.