நானும் கதாசிரியரே! 4 - ‘வேகி’ கழுகின் கடும் பசி

சென்ற பகுதியில் பசியோடு இருந்த கழுகு பற்றி பார்த்தோம் இல்லையா? அந்தக் கதையை எப்படி எழுதலாம் என்பதைப் பார்ப்போம். அது ஒரு பெரிய காடு. அங்கே ‘வேகி’ என்ற ஒரு கழுகு வசித்தது. வேகி என்ற பெயர் ஏன் வந்தது தெரியுமா? அங்குள்ள மற்ற கழுகுகளை விடவும் வேகமாக இது பறக்கும். அதனால், அதை வேகி என்று அழைத்தார்கள். ஒருநாள் ’வேகி’ கழுகு நீண்ட தூரம் பறந்து சென்றது.

அதனால், மிகவும் களைப்பாக இருந்தது. கூடவே பசிக்கவும் செய்தது. ஏதாவது இரை கிடைக்குமா என்று காட்டுக்குள் தேடியது. அந்தப் பகுதியை இரண்டுமுறை சுற்றி வந்தும் அதன் கூர்மையான பார்வை திறன் வாய்த்த அதன் கண்களுக்கு இரை ஏதும் தென்படவில்லை. கழுகு ரொம்பவும் சோர்ந்துவிட்டது.