உலகம் - நாளை - நாம் - 5: உயர்ந்து நிற்கும் மலையும்... விடாது பொழியும் மழையும்!

அருணாச்சல பிரதேசம், சிக்கிம், அசாம், நாகாலாந்து, மேகாலயா, மணிப்பூர், திரிபுரா, மிசோரம் ஆகிய எட்டும், 'வடகிழக்கு மாநிலங்கள்' ஆகும். இந்திய நிலப்பரப்பில் சுமார் 8% உள்ள இந்த மாநில எல்லைகளை ஒட்டி நெருக்கமாய் திபெத் (சீனாவின் பகுதி), மியான்மர், வங்காளம், நேபாளம், பூட்டான் ஆகிய நாடுகள் அமைந்துள்ளன. இதன் காரணமாக இப்பகுதி பாதுகாப்பு முக்கியத்துவம் பெற்றதாகவும் திகழ்கிறது.

கிழக்கு இமயமலைப் பகுதியில், பராக் - பிரம்மபுத்திரா சமவெளியில் அமைந்துள்ள வடகிழக்கு மாநிலங்களில் கோடை, மழை, குளிர் ஆகிய மூன்று பருவங்களும் கடுமையாக இருக்கின்றன. ஆங்காங்கே மலைகள், இடையிடையே சமவெளிகள், கொட்டித் தீர்க்கும் மழை, இதனால் விளையும் வெள்ளம் ஆகியன வடகிழக்கு மாநிலங்களின் பூகோள அடையாளம்.