தயங்காமல் கேளுங்கள் - 16: சிவப்பழகு கிரீம்கள் பூசலாமா?

டாக்டர்... நான் கொஞ்சம் கருப்பு... என் ஃப்ரெண்ட்ஸ் எல்லாரும் ஃபேர்னஸ் கிரீம்களை பூசுனா சிவப்பாயிடுவேன்னு சொல்றாங்க. வாங்கி பயன்படுத்தலாமா என்று, ஒரு பிரபல நிறுவனத்தின் விலையுயர்ந்த கிரீமை சுட்டிக்காட்டி கேள்வி எழுப்பியிருக்கிறாள் ஒன்பதாம் வகுப்பு சுனிதா.

சிவப்பழகு கிரீம் நம்மை எப்படி சிவப்பாக்குகிறது என்பதைத் தெரிந்துகொள்ளும் முன், நமது சருமத்தைப் பற்றி படித்ததைக் கொஞ்சம் நினைவுபடுத்திக் கொள்வோம் சுனிதா. பொதுவாக மனிதனின் தோல் உடலுக்குள் இருக்கும் தசைகள், எலும்புகள், தசைநார்கள், உள்ளுறுப்புகள் ஆகியவற்றைப் பாதுகாப்பதுடன், வெளியிலிருக்கும் கிருமிகளில் இருந்துஉடலை காத்து, வெளிப்புற தட்பவெப்பத்திற்குத் தகுந்தவாறு உடலின் வெப்பத்தை சமச்சீராக வைக்க உதவுகிறது. இப்படிப்பட்ட தோல் மூன்று அடுக்குகளாலான உணர்ச்சியுடன் கூடிய உறுப்பாகும்.