பூ பூக்கும் ஓசை - 23: ஒரு தலைமுறையின் பலனுக்காக எல்லோரையும் காவு வாங்க வேண்டுமா?

சூரிய ஆற்றல், காற்றாற்றல்போல் நாம் பயன்படுத்தும் மற்றொரு தொழில்நுட்பம் நீர்மின் சக்தி தொழில்நுட்பம். இந்த முறையில் நாம் நீர்த்தேக்கங்களை உருவாக்கி அதில் நீரைச் சேகரிக்க வேண்டும். பின் அந்த நீரினை அருகே அமைக்கப்பட்டுள்ள டர்பைன்கள் வழி செலுத்துவதன் மூலம் அதனைச் சுழல வைத்து மின்சாரத்தை உற்பத்தி செய்யலாம். இந்த முறையிலும் நமக்குக் கார்பன் பெரிய அளவில் உமிழப்படுவதில்லை. தமிழ்நாட்டிலேகூட இதுபோன்று கிட்டத்தட்ட 20 நீர்மின் நிலையங்கள் இருக்கின்றன.

இதன்மூலம் தமிழ்நாட்டிற்கு 8.4% மின் உற்பத்தி கிடைக்கிறது. உலகின் மிகப்பெரிய நீர்மின் நிலையம் சீனாவில் உள்ள மூன்று ஆழ்பள்ளத்தாக்கு அணையில் அமைந்துள்ளது. 2021ஆம் ஆண்டு நெதர்லாந்து நாடு அளவுள்ள பகுதி முழுமைக்கும் தேவையான மின்சாரம் அதிலிருந்து உருவாக்கப்பட்டது. உலகம் முழுவதும் நீர்மின் ஆற்றலின் மூலம் 16% மின்சாரம் உற்பத்தி செய்யப்படுகிறது. ஆனால், இதிலும் ஒரு பிரச்சினை இருக்கிறது.