மாறட்டும் கல்விமுறை - 21: குழந்தைகள் படிக்கும் முதல் புத்தகம்

விமானப் பணிப்பெண் வேலைக்குப் பயிற்சி பெற்றவர் ஒருவர் தற்காலிகமாக ஒரு தனியார் பள்ளியில் அரும்பு வகுப்பாசிரியராக வேலைக்குச் சேர்ந்தார். அவர் ஆசிரியப் பயிற்சி பெற்றவர் அல்ல. பாடப்பொருளின் ஆழங்களை அறிந்தவர் அல்ல. இருந்தாலும் அவருடைய வகுப்பைக் குழந்தைகள் பெரிதும் விரும்பினர். அவருடைய வகுப்புக்கும் பிற ஆசிரியர்களுடைய வகுப்புக்கும் பல வேறுபாடுகள் இருந்தன. பயணிகளின் வசதியான, மகிழ்ச்சியான பயணத்தை உறுதி செய்வதுதானே பணிப்பெண்களின் தலையாய நோக்கம். கூப்பிட்ட குரலுக்கு ஓடி வருவது ஒரு பக்கம் எனில் பயணிகளின் உடல்மொழியைப் புரிந்துகொண்டு வலிந்து சென்று என்ன வேண்டும் என்று கேட்கவும் அவர்களுக்குப் பயிற்சியளிக்கப்படுகிறது.