மகத்தான மருத்துவர்கள் - 49: இந்தியாவின் குழந்தைகள் நல மருத்துவத்தின் தந்தை

ஐசக் நியூட்டன், ஆல்பர்ட் ஐன்ஸ்டீன், சார்லஸ் டார்வின், நெப்போலியன் பொனபார்ட், மார்க் டுவெய்ன், வின்ஸ்டன் சர்ச்சில்... அரிதான அறிவியல் கண்டுபிடிப்புகள், வலிமையான போர் தொழில், திறமையான எழுத்து, நேர்மையான ஆட்சி...என இந்தப் பெயர்களை நமது பாட புத்தகங்களில் வருடங்கள்தோறும் படித்துக் கொண்டே தான் இருக்கிறோம். ஆனால், இந்தப் பெயர்களையும் இவர்களது வியக்கத்தக்க செயல்களையும் தாண்டி இவர்கள் எல்லாருக்குமிடையே ஓர் ஒற்றுமை உள்ளது. இவர்கள் அனைவரும் குறைமாதக் குழந்தைகள் என்பது தான் அது.

ஆச்சர்யமாக இருக்கிறதல்லவா? ஆம்!இவர்கள் அனைவரும் இவர்களது அன்னையர்க்கு, குறிக்கப்பட்ட தேதிக்கு முன்பாக, அதுவும் ஓரிரு மாதங்கள் முன்பாகவே பிரசவித்தவர்கள். அத்துடன் பிறந்தது முதலாக சவால்களை எதிர்கொண்டு பெரும்சாதனைகளைப் படைத்தவர்கள். ஆனால், இவர்கள் பிறந்தவுடன் ஏற்பட்ட பல சவால்களை இவர்கள் யாரும் தனியாக எதிர்கொள்ளவில்லை. அந்தந்தக் காலகட்டங்களில் இவர்களது பெற்றோரும், இன்னும் குறிப்பாக இவர்களது மருத்துவர்களும் செவிலியர்களும் சேர்த்தே தான் பல சவால்களைச் சந்தித்துள்ளனர்.