இவரை தெரியுமா? - 18: உடன்பாடில்லை என்றாலும், பிறர் கருத்துரிமை பாதுகாத்த வோல்டேர்

கி.பி. 1778இல் தான் எழுதிய ‘ஐரீன்’ எனும் புகழ்பெற்ற நாடகத்தின் திரையிடலுக்காக, பாரிஸ் நகரில் அடியெடுத்து வைத்தார் அந்த முதியவர். பிரெஞ்சு அறிவொளி இயக்கத்தின் “முதுபெரும் கிழவனே” என்று அரங்கம் அதிர பலர் ஆர்ப்பரிக்க, வோல்டேர் பவ்வியமாக நடந்து வந்தார். வோல்டேருக்கு அப்போது வயது 83.

தன் இளமைப் பருவத்தில் இருந்தே முற்போக்கு விதைகளை விதைத்து, சிறை சென்று, ஓடாய்த் தேய்ந்து, நவீன உலகிற்கு அணையா வெளிச்சத்தைப் பாய்ச்சிய மிக முக்கியச் சிந்தனையாளர், வோல்டேர். உலகம் தழுவிய சிந்தனையாளரின் பூதவுடலை, நல்லடக்கம் செய்யவே அனுமதி மறுத்த சோகம் தெரியுமா உங்களுக்கு?