கழுகுக் கோட்டை 07: அம்மன் கோயிலும் அதல பாதாளமும்

சாமியார் வேடமணிந்த குழுவினர் சென்றவுடன் எதிர் திசையிலிருந்து சிலர் வருகிற சத்தம் கேட்டது. வருவது திருச்சேந்தியின் ஆட்களாக இருந்தால் என்ன செய்வது என்று குணபாலன் திகைத்தான். சரி வருவது யாராக இருந்தாலும் வரட்டும். ஒரு கை பார்த்துவிடுவோம் என்று நினைத்துக்கொண்டு அங்கிருந்த ஒரு பாறையின் மேல் உட்கார்ந்துகொண்டான்.

முதலில் சில வீரர்கள் முன்னாள் வந்தனர். அவர்களுக்கு அடுத்ததாக ஒரு பல்லக்கு வந்தது. அந்தப் பல்லக்கின் பின்னாலும் சில வீரர்கள் வந்துகொண்டிருந்தனர். அந்தப் பல்லக்கு அரண்மனையிலிருந்து வந்திருக்கக் கூடும் என்று குணபாலன் நினைத்துக்கொண்டான்.