கழுகுக் கோட்டை 04: அரண்மனையில் நடந்த அவசர ஆலோசனை

அரண்மனையிலிருந்து குதிரையில் வந்த வீரன், திருச்சேந்தியின் அருகில் வந்ததும் குதிரையை விட்டு இறங்கிப் பணிவாக வணங்கி நின்றான். அவனை அலட்சியப் பார்வையோடு எதிர்கொண்ட திருச்சேந்தி, என்ன விஷயம் என்கிற கேள்வியை எழுப்புகிற விதமாக தன் புருவங்களைத் தூக்கி இறக்கிப் பார்வையாலேயே பணித்தார்.

உடனே அந்த வீரனும் தன் இடையில் செருகி வைத்திருந்த ஓலைச்சுவடியைப் பணிவாக எடுத்து நீட்டினான். அவனிடமிருந்த ஓலைச்சுவடியைத் தனது இடது கையால் வாங்கிய திருச்சேந்தி ஓலைச்சுவடியில் உள்ள எழுத்துகள் மீது பார்வையை ஓடவிட்டார். அதில்,அவசர ஆலோசனைக் கூட்டம் நடைபெற உள்ளது. உடனே புறப்பட்டு வரவும். மன்னரின் ஆணைப்படி, என முதலமைச்சரின் கையொப்பமும் முத்திரையும் இருந்தன.