வாழ்ந்து பார்! - 32: ஏன் அமிழ்தினி குழம்பினாள்?

மாணவர்கள் ஒவ்வொருவரும் தான் மணிவண்ணனாக இருந்தால் எந்தப் பாடப்பிரிவை ஏன் தேர்ந்தெடுப்பேன் என்று விளக்கினர். அவர்கள் ஒவ்வொருவரின் விளக்கத்தையும் கூர்ந்துகேட்டு, “அருமை. எல்லாரும் சிறப்பாக முடிவெடுத்திருக்கிறீர்கள்” என்று பாராட்டினார் எழில்.

“ஓர் ஐயம்” என்றாள் இளவேனில். ‘என்ன?’ எனக் கேட்பதைப்போல அவளது கண்களை நோக்கினார் எழில். “மணிவண்ணன் தேர்ந்தெடுக்க வேண்டிய பாடப்பிரிவு” என்னும் ஒரேயொரு சூழலுக்கு நாங்கள் அனைவரும் கூறிய வெவ்வேறு விடைகள் எப்படிச் சரியாகும்?” என்று வினவினாள் அவள். “அதானே, ஒரு வினாவுக்கு ஒரு விடைதானே சரியாக இருக்க முடியும்? எல்லாரின் விடையும் எப்படிச் சரியாகும்?” என்று சண்டைக்கு வருபவளைப்போல வினவினாள் மதி.