மகத்தான மருத்துவர்கள் - 31: கருங்காய்ச்சலை விரட்டிய காலா

1900 வருடங்களின் முற்பகுதி...அசாம், மேற்கு வங்கம், பிஹார் முதலிய கிழக்கு மாநிலங்களைச் சேர்ந்த மக்களை புதிய வகைக் காய்ச்சல் தாக்கத் தொடங்கியிருந்தது.

அந்தக் காய்ச்சலால் பாதிக்கப்பட்டவர்கள் அனைவரும் அதிகளவு காய்ச்சலுடன், உடல் கறுத்து இறுதியில் கொத்துக்கொத்தாக இறக்கவும் செய்தனர். எமன் பாசக்கயிற்றை வீசி ஒவ்வொரு உயிராகப் பறிக்காமல், ஒரு வலையையே வீசி பல உயிர்களை ஒன்றாக அள்ளுவதைப் பார்த்து, ‘காலா-அசார்' (Kala-azar) என்று அந்த கருங்காய்ச்சல் நோயின் பெயரைக் கேட்டாலே மக்கள் நடுங்கினர். புதியதொரு சவாலால் திகைத்து நின்றது மருத்துவ உலகம். அதிலிருந்து விடுபட துரிதமாகப் போராடி, ஒரு தடுப்பு மருந்தைக் கண்டுபிடிக்க, ஆனால் அந்த அது காய்ச்சலை விட மோசமான பக்கவிளைவுகளை ஏற்படுத்தியது. அந்த சமயத்தில் ஒரு சுலபமான மருந்தைக் கண்டுபிடித்து, காலா-அசார் என்ற எமனுக்கே எமனாக மாறினார் டாக்டர் உபேந்திரநாத் பிரம்மச்சாரி.