பார்வை இழந்த மாணவர்களின் தமிழ் தாகம் தணியட்டும்

தமிழ் இலக்கியம் மீது பேரார்வம் கொண்ட பார்வை இழந்த மாற்றுத்திறனாளி மாணவர்கள் பிரெய்லி முறை மூலம் ஐம்பெரும் காப்பியங்கள் உள்ளிட்ட 46 பழம்பெரும் இலக்கியப் படைப்புகளை வாசிக்க செம்மொழித் தமிழாய்வு மத்திய நிறுவனம் ஏற்பாடு செய்துள்ளது. திருக்குறளுக்கு அடுத்தபடியாக இத்தனை பெரிய இலக்கிய தொகுப்பு பிரெய்லி முறைக்கு மாற்றப்படுவது இதுவே முதல் முறையாகும்.

சிலப்பதிகாரம், மணிமேகலை, தொல்காப்பியம், நற்றினை உள்ளிட்ட 46 வகையான பழம்பெரும் இலக்கியப் படைப்புகளை பார்வை இழந்தோர் வாசிக்க ஏதுவாக பிரெய்லிக்கு மாற்றப்பட்டு வருகின்றன. அதுவும் கட்டணம் ஏதுமின்றி இலவசமாக இப்புத்தகங்கள் பார்வையில்லா மாற்றுத்திறனாளிகளின் கைகளில் வரும் டிசம்பரில் தவழும் என்று தெரிவிக்கப்பட்டுள்ளது. இந்த படைப்புகளின் அசல் வடிவம் மட்டுமல்லாது அவற்றுக்கான எளிமையான பொருள்விளக்கமும் பிரெய்லி வடிவம் பெறுவது கூடுதல் சிறப்பு.