மழைக்காலத்தில் மாணவர்களின் பாதுகாப்பை உறுதி செய்யுங்கள்

மழைக்காலத்தில் பள்ளிகளுக்கு விடுமுறை விடுவது குறித்து அந்தந்த மாவட்ட ஆட்சியரே முடிவு செய்கிறார்கள். காலாண்டு விடுமுறை முடிந்து கடந்த 10-ம் தேதி பள்ளிகள் திறக்கப்பட்டன. அதற்கு முதல் நாள் மாநிலத்தின் பல பகுதிகளில் கனமழை பெய்ததால் அப்பகுதியில் உள்ள பள்ளிகளுக்கு விடுமுறை விடப்பட்டது.

புதுக்கோட்டை பள்ளிகளுக்கு விடுமுறை விடப்பட்டதுதான் வினோதம். ‘‘பள்ளிக்கு லீவு விடுங்க, உங்களுக்கு கோயில் கட்டுகிறேன்’’ என ஒரு மாணவரும், விடுமுறை கோரி பல மாணவர்கள் புதுக்கோட்டை மாவட்ட ஆட்சியர் கவிதா ராமுவுக்கு இன்ஸ்டாகிராமிலும், குறுஞ்செய்தி வாயிலாகவும் கோரிக்கை விடுத்தனர். ஆட்சியரும் பள்ளிகளுக்கு விடுமுறை அளித்தார். ஆனால், 10-ம் தேதி மழை பெய்யவில்லை.