முதுகலை மருத்துவப் படிப்பு: இனி-செட் 2021 கலந்தாய்வுத் தேதிகள் அறிவிப்பு

முதுகலை மருத்துவப் படிப்புகளுக்கான நுழைவுத் தேர்வான 'இனி-செட் 2021' கலந்தாய்வுத் தேதிகள் குறித்து அறிவிப்பு வெளியாகியுள்ளது.

மத்திய அரசால் நடத்தப்படும் எய்ம்ஸ், புதுச்சேரி ஜிப்மர், பெங்களூரு நிம்ஹான்ஸ், சண்டிகர் பிஜிஐஎம்இஆர் உள்ளிட்ட 11 கல்லூரிகளில், 2021-ல் முதுகலை மருத்துவப் படிப்புகளில் சேர்வதற்கு இந்த ஆண்டில் இருந்து தனி நுழைவுத் தேர்வு (இனி - செட்) நடத்தப்படுகிறது.

முதுகலை மருத்துவப் படிப்புகளான எம்.எஸ்., எம்டி., எம்.எச்., டி.எம்., எம்.சிஎச்., எம்.டி.எஸ் ஆகிய படிப்புகளுக்காக இனி செட் தேர்வு நாடு முழுவதும் நவ.20 ஆம் தேதி நடைபெற்றது.

இதற்கான முடிவுகள் நவம்பர் 28 ஆம் தேதி வெளியாகின. இந்நிலையில் 'இனி-செட் 2021' கலந்தாய்வுத் தேதிகள் குறித்து அறிவிப்பு வெளியாகியுள்ளது.

இந்தக் கலந்தாய்வு மாதிரிக் கலந்தாய்வுடன் சேர்த்து 4 கட்டங்களாக நடைபெறவுள்ளது. கலந்தாய்வுக்கு விண்ணப்பிக்க 10, 12 ஆம் வகுப்பு மதிப்பெண் சான்றிதழ் உள்ளிட்ட ஆவணங்களைக் குறிப்பிட்ட வடிவத்தில் பதிவேற்றம் செய்ய வெண்டும்.

இதன்படி முதல்கட்டக் கலந்தாய்வுக்கான இட ஒதுக்கீடு குறித்த அறிவிப்பு டிசம்பர் 22-ம் தேதி வெளியாகும். முதல்கட்டக் கலந்தாய்வில் ஒதுக்கப்பட்ட இடம் குறித்த ஒப்புதலை டிச.23 முதல் 26-ம் தேதிக்குள் அளிக்க வேண்டும்.

இரண்டாம் கட்டக் கலந்தாய்வுக்கான இட ஒதுக்கீடு குறித்த அறிவிப்பு அடுத்த ஆண்டு ஜனவஒரி 4-ம் தேதி வெளியாகும். முதல்கட்டக் கலந்தாய்வில் ஒதுக்கப்பட்ட இடம் குறித்த ஒப்புதலை ஜனவரி 5 முதல் 8-ம் தேதிக்குள் அளிக்க வேண்டும்.

கூடுதல் விவரங்களுக்கு: aiimsexams.org