நீலகிரியில் இ-பாஸ் நடைமுறை நீட்டிப்பு: சுற்றுலா பயணிகளுக்கு ஆட்சியரின் வேண்டுகோள்

உதகை: நீலகிரி மாவட்டத்துக்கு வர இ-பாஸ் நடைமுறையை நீதிமன்றம் நீடித்துள்ளதால், சுற்றுலா பயணிகள் இ-பாஸ் நடைமுறையை பின்பற்றி வர வேண்டும் என மாவட்ட ஆட்சியர் லட்சுமி பவ்யா அறிவுறுத்தியுள்ளார்.

இது குறித்து அவர் இன்று (அக்.1) கூறியதாவது: “சென்னை உயர் நீதிமன்ற உத்தரவின்‌ படி நீலகிரி மாவட்டத்துக்கு பிற மாநிலங்கள்‌ மற்றும்‌ மாவட்டங்களிலிருந்து வாகனங்கள்‌ மூலம்‌ வரும் சுற்றுலா பயணிகள்‌ கடந்த மே மாதம் 7-ம் தேதி முதல்‌ இ-பாஸ்‌ பயன்படுத்தி நீலகிரி மாவட்டத்துக்குள்‌ நுழைய உத்தரவிடப்பட்டிருந்தது. இந்த உத்தரவு செப்டம்பர் மாதம் 30-ம் தேதி வரை நீடிக்கப்பட்டது.

இதனால், நேற்று (செப்.30) வரை இ-பாஸ்‌ முறை நடைமுறையில்‌ இருந்து வந்தது. இந்நிலையில்‌, சென்னை உயர்நீதி மன்றத்தால்‌ மறு உத்தரவு பிறப்பிக்கப்படும்‌ வரை இ-பாஸ்‌ நடைமுறையை நீட்டிக்க உத்தரவிடப்பட்டுள்ளது.

எனவே, நீலகிரி மாவட்டத்துக்குள்‌ வரும்‌ அனைத்து சுற்றுலா பயணிகளும்‌ ஏற்கனவே நடைமுறையில்‌ உள்ளவாறு www.epass.tnega.org என்ற இணையதளம்‌ மூலம்‌ இ-பாஸ்‌ பெற்று நீலகிரி மாவட்டத்திற்குள்‌ வரும்படி கேட்டுக்கொள்ளப்படுகிறார்கள்.

நீலகிரி மாவட்டத்தில்‌ வசிக்கும் பொது மக்கள்‌, நீலகிரி மாவட்ட பதிவு எண்‌ டிஎன் 43 பெற்றிருந்தால்‌ அந்த வாகனங்களுக்கு இ-பாஸ்‌ தேவையில்லை. மாவட்ட எல்லையில்‌ அமைந்துள்ள சோதனைச் சாவடிகளில்‌ இ-பாஸ் சரிபார்ப்பு பணிக்காக வாகனங்களை நிறுத்தி சரிபார்ப்புக்கு பிறகு நீலகிரி மாவட்டத்துக்குள்‌ நுழைய வேண்டும். இதுதொடர்பாக மாவட்ட நிர்வாகத்துக்கு உரிய ஒத்துழைப்பை பொது மக்கள்‌ மற்றும்‌ சுற்றுலா பயணிகள்‌ அளிக்க வேண்டும்.” என்று அவர் கூறினார்.