அதிமுக தலைமையை ஏற்கும் கட்சிகள்தான் கூட்டணியில் இருக்கும் முதல்வர் பழனிசாமி திட்டவட்டம்

அதிமுக தலைமையை ஏற்கும் கட்சிகள் தான் கூட்டணியில் இருக்கும் என தமிழக முதல்வர் பழனிசாமி தெரிவித்தார்.

திருச்சி மாவட்டத்தில் 2-வது நாளாக நேற்று தமிழக முதல்வர் பழனிசாமி தேர்தல் பிரச்சாரம் மேற்கொண்டார். பின்னர் அவர் செய்தியாளர்களிடம் கூறியது:

வரும் சட்டப்பேரவை தேர்தலில் அதிமுக தலைமையில் தான் கூட்டணி. அதிமுக கூட்டணியில்தான் பாஜக உள்ளது. ஏற்கெனவே அறிவித்தவாறு அதிமுக தலைமையை ஏற்கும் கட்சிகள் தான் கூட்டணியில் இருக்கும். இந்த கூட்டணியில் கடந்த தேர்தலில் உள்ள கட்சிகள் இப்போதும் உள்ளன. தேர்தல் நெருங்கும்போதுதான் அதிமுக கூட்டணிக்குபுதிய கட்சிகள் வருமா என்பது தெரியும். தேர்தல் அறிவிப்புக்குப் பிறகே அதிமுக கூட்டணியின் கூட்டம் நடைபெறும். தேர்தலுக்கு காலம் குறைவாக இருப்பதால் இப்போதே பிரச்சாரத்தை தொடங்கியுள்ளேன்.

சசிகலா வெளியில் வந்த பிறகு என்ன நடக்கும் என்பதை இப்போது யூகமாக கூறமுடியாது. எங்களைப் பொறுத்தவரை எந்த மாற்றமும் இருக்காது. பாஜகவுடன் இருப்பதால் அதிமுகவுக்கு சிறுபான்மையினரின் வாக்குகள் கிடைக்காது எனக் கூற முடியாது. ஏனெனில், ஒவ்வொரு கட்சிக்கும் ஒவ்வொரு கொள்கை உண்டு. கொள்கை வேறு, கூட்டணி வேறு. தேர்தல் வெற்றிக்காகவே கூட்டணி வைக்கப்படுகிறது.

ஒன்றரை ஆண்டுக்கு முன் டெண்டர் ரத்து செய்யப்பட்டதுகூட தெரியாமல், அந்தப் பணியில் முறைகேடு நடைபெற்றுள்ளதாக ஆளுநரிடம் எதிர்க்கட்சித் தலைவர் ஊழல் புகார் கூறுகிறார். ஆட்சியைக் கலைக்க அவர் எடுத்த முயற்சிகள் அனைத்தும் முறியடிக்கப்பட்டு சிறப்பான ஆட்சி அளித்து வருகிறோம். பல்வேறு துறைகளிலும் நாட்டிலேயே முதன்மையாக தமிழகம் விளங்குகிறது.

கட்சியின் பொதுக்குழு கூட்டத்துக்குப் பிறகு துணை முதல்வர் ஓ.பன்னீர்செல்வம் தமிழகம் முழுவதும் பிரச்சாரம் மேற்கொள்வார். காவிரி- குண்டாறு- வைகை இணைப்புத் திட்டத்துக்கு விரைவில் அடிக்கல் நாட்டப்படும்.

பொருளாதார நிபுணர் ரங்கராஜன் குழு அளித்த ஆலோசனை மற்றும் கரோனாவால் மக்கள் வாழ்வாதாரம் பாதிப்பு ஆகியவற்றை கருத்தில் கொண்டே பொங்கல் பண்டிகையை சிறப்பாககொண்டாட ரூ.2,500 ரொக்கத் துடன் கூடிய பொங்கல் பரிசுத் தொகுப்பு வழங்கப்படுகிறது.

கரோனா பரவலைப் பொறுத்தே பொதுத் தேர்வு நடத்துவது குறித்து முடிவு செய்யப்படும். நான் அரசியலில் இருக்கும் வரை எடப்பாடி தொகுதியில் தான் போட்டியிடுவேன். மக்கள் என்னை நிச்சயம் வெற்றி பெற வைப்பார்கள். இவ்வாறு முதல்வர் பழனிசாமி கூறினார்.

முன்னதாக ரங்கம் ரங்கநாதர் கோயிலில் தரிசனம் செய்த முதல்வர் பழனிசாமி, ரங்கம், சோமரசம்பேட்டை, மணப்பாறை, திருவெறும்பூர், திருச்சி மாநகரப் பகுதிகளில் தேர்தல் பிரச்சாரம் மேற்கொண்டார்.