பெரம்பலூர் காவல் நிலையத்தில் தலைமையிடத்து ஐஜி ஆய்வு :

பெரம்பலூர்: தமிழகத்தில் சிறந்த காவல் நிலையங்களை தேர்வு செய்யும் பணி நடைபெற்று வருகிறது. கடந்த 2020-ம் ஆண்டுக்கான சிறந்த காவல் நிலையமாக பெரம்பலூர் காவல் நிலையம் உட்பட 3 காவல் நிலையங்கள் தேர்வு செய்யப்பட்டுள்ளன. இவ்வாறு தேர்வு செய்யப்பட்டுள்ள பெரம்பலூர் காவல் நிலையத்தை சென்னை தலைமையிடத்து போலீஸ் ஐஜி கணேசமூர்த்தி நேற்று நேரில் பார்வையிட்டு ஆய்வு செய்தார்.

ஆய்வின்போது, வழக்குகளை விரைந்து முடித்தல், காவல் நிலையத்துக்கு வருகை தரும் பொதுமக்களை கண்ணியத்துடன் நடத்துதல், சுற்றுப்புறத்தை அழகாகவும், தூய்மையாகவும் வைத்திருத்தல், ஆவணங்களை முறையாக பராமரித்தல் உள்ளிட்ட பல்வேறு பணிகளை பார்வையிட்டு ஆய்வு செய்தார்.

இந்த ஆய்வின்போது பெரம்பலூர் மாவட்ட காவல் கண்காணிப்பாளர் மணி, துணை கண்காணிப்பாளர் சஞ்சீவ்குமார் ஆகியோர் உடனிருந்தனர்.