புதுச்சேரியில் இரவு நேரங்களில் பெண்களுக்கு பாதுகாப்பு அளிக்க, அம்மாநில அரசு புதிய திட்டத்தைக் கொண்டுவர உள்ளது.
புதுச்சேரி சட்டப்பேரவையில் நேற்று மானியக் கோரிக்கை மீதான இறுதி விவாதத்தில் பதிலளித்து உள்துறை அமைச்சர் நமச்சிவாயம் பேசியதாவது:
புதுச்சேரியில் பெண்களின் பாதுகாப்பை உறுதி செய்ய புதிய திட்டம் அறிமுகமாகிறது.
இரவு 10 மணி முதல் காலை 6 வரை தனியாக இருக்கும் பெண்களோ, பணிமுடிந்து வீட்டுக்குச் செல்லும் பெண்களோ, வெளியூரில் இருந்து வந்துள்ள பெண்களோ, தங்களுக்குப் பாதுகாப்பு இல்லை என்று கருதினால் காவல் துறை கட்டுப்பாட்டு எண் 112-க்கு தொடர்பு கொள்ளலாம்.
காலதாமதமின்றி ஒரு பெண் காவலருடன், நான்குசக்கர வாகனத்துடன் சென்று, அந்தப் பெண்ணை, அவர் அளித்த முகவரியில் பாதுகாப்புடன் சேர்ப்பார்கள். இவ்வாறு அமைச்சர் தெரிவித்தார். விரைவில் இந்த திட்டம் நடைமுறைக்கு வரும் என்று தெரிகிறது.