தி.மலை மாவட்டத்தில் - ஒரே நாளில் 78 பேர் மனுத்தாக்கல் :

திருவண்ணாமலை மாவட்டத்தில் நேற்று ஒரே நாளில் 78 பேர் வேட்பு மனு தாக்கல் செய்துள் ளனர்.

திருவண்ணாமலை மாவட்டத்தில் உள்ள 8 சட்டப்பேரவைத் தொகுதிகளில் கடந்த ஒரு வாரமாக வேட்பு மனு தாக்கல் நடைபெற்று வந்தது. முதல் 5 நாட்கள் நடைபெற்ற வேட்பு மனு தாக்கலில், 110 பேர் வேட்பு மனு தாக்கல் செய்திருந்தனர்.

இந்நிலையில், கடைசி நாளான நேற்று வேட்பு மனு தாக்கல், ஒவ்வொரு தொகுதியிலும் விறுவிறுப்பாக நடைபெற்றது. பாஜக, அதிமுக, தேமுதிக, நாம் தமிழர், மக்கள் நீதி மய்யம் மற்றும் சுயேட்சைகள் ஆகியோர் வேட்பு மனு தாக்கல் செய்தனர்.

நேற்று ஒரே நாளில் 78 பேர் வேட்பு மனு தாக்கல் செய்துள்ளதாக தேர்தல் அலுவலகம் மூலம் தெரிவிக்கப்பட்டுள்ளது. இதுவரை, திருவண்ணாமலை மாவட்டத்தில் 188 பேர் மனு தாக்கல் செய்துள்ளனர்.