சிவகங்கை மாவட்டத்துக்கு பெருமை சேர்ந்த காரைக்குடி நகராட்சி தொடக்கப் பள்ளி : மாணவர்கள் எண்ணிக்கை ஆயிரத்தை கடந்தது

காரைக்குடி நகராட்சி தொடக்க பள்ளியில் மாணவர்கள் எண்ணிக்கை ஆயிரத்தை கடந்து, சிவகங்கை மாவட்டத்துக்கு பெருமை சேர்த்துள்ளது.

தமிழகத்தில் பல அரசு தொடக்கப் பள்ளிகளில் 10-க்கும் குறைவான மாணவர்களே படிக்கும் இக்கால கட்டத்தில் சிவகங்கை மாவட்டத்திலேயே அதிக மாணவர்கள் படிக்கும் பள்ளியாக காரைக்குடி ராமநாதன் செட்டியார் நகராட்சி தொடக்கப் பள்ளி மாறியுள்ளது. சுதந்திரத்துக்கு முன்பு 1939-ம் ஆண்டு இப்பள்ளி தொடங்கப்பட்டது. இங்கு 10 ஆண்டுகளுக்கு முன்பு மாணவர்கள் எண்ணிக்கை குறையத் தொடங்கியது. தலைமை ஆசிரியர், ஆசிரியர்கள் முயற்சியால் தனியாருக்கு நிகராக இப்பள்ளி மாறியது. இதனால் மாணவர்கள் சேர்க்கை 2014-ம் ஆண்டு முதல் படிப்படியாக உயரத் தொடங்கியது. கடந்த ஆண்டு இப்பள்ளியில் 730 மாணவர்கள் படித்தனர். இந்த கல்வியாண்டில் ஒன்று முதல் ஐந்தாம் வகுப்பு வரை மாணவர் எண்ணிக்கை 1,040-ஆக உயர்ந்துள்ளது.

இது குறித்து தலைமை ஆசிரியர் சாவித்திரி கூறியதாவது:

நான் தலைமை ஆசிரியராகப் பொறுப்பேற்றபோது, மாணவர் கள் எண்ணிக்கை குறைந்ததால் ஆசிரியர்கள் பலர் உபரியாக இருந் தனர். தற்போது மாணவர்களின் எண்ணிக்கை 5 மடங்காக உயர்ந்துள்ளது. இதனால் 10 ஆசிரியர்கள் கூடுதலாக தேவைப்படுகின்றனர். மேலும் கூடுதலாக 10 வகுப்பறைகள் தேவைப்படுகின்றன.

இதுகுறித்து வட்டார கல்வி அலுவலரிடம் தெரிவித்தோம். அவரும் கூடுதல் ஆசிரியர்களை நியமிக்கவும், வகுப்பறைகளை கட்டித் தரவும் நடவடிக்கை எடுப்பதாக கூறியுள்ளார் என்றார்.