அதிமுக ஆட்சியில் குற்றம்சாட்ட ஏதுமில்லை நெல்லையில் குஷ்பு கருத்து

“அதிமுக ஆட்சியில் குற்றம்சாட்ட எதுவும் இல்லை” என்று, பாஜக நட்சத்திர பேச்சாளரான நடிகை குஷ்பு தெரிவித்தார்.

சட்டப்பேரவைத் தேர்தலை முன்னிட்டு திருநெல்வேலியில் பாஜக சார்பில் நடைபெற்ற பேரணியில் பங்கேற்ற அவர் செய்தியாளர்களிடம் கூறியதாவது:

சட்டப்பேரவை தேர்தலில் அதிமுக- பாஜக கூட்டணிக்கு மிகப்பெரிய வெற்றி காத்திருக்கிறது. கடந்த 6 ஆண்டுகளில் மத்தியில் பாஜக ஆட்சியில் பல்வேறுதிட்டங்கள் கொண்டுவரப்பட்டுள்ளன. பிரதமர் மோடி தமிழகத்துக்கு பல நல்ல திட்டங்களை கொடுத்துள்ளார். அதிமுக ஆட்சியில் குற்றம்சாட்ட எதுவுமே இல்லை. முதல்வர் பழனிசாமி மீது எவ்வித ஆதாரபூர்வ குற்றச்சாட்டும் இல்லை.

நிதியாண்டு தொடக்கத்தில் எரிபொருள் விலை உயர்வு இருக்கவே செய்யும். சுமார் 1 கோடி பெண்களுக்கு இலவச எரிவாயு இணைப்பு கொடுக்கப்படவுள்ளது.

ஒரு தலைவர் தான் என்னசெய்யப்போகிறார் என்பதை மக்களுக்கு சொல்ல வேண்டும். அதைவிட்டு, தண்ணீரில் குதித்துநீச்சல் அடிப்பதோ, மாணவர்களுடன் சேர்ந்து குஸ்திபோடுவதோ ஒரு தலைவருக்கு நல்லதல்ல என்றார் அவர்.

பேரணியில் பாஜக மாநில துணைத் தலைவர் நயினார் நாகேந்திரன், மாவட்ட தலைவர் மகாராஜன் உள்ளிட்டோர் பங்கேற்றனர்.