வடசென்னை மின் நிலையத்தில் உற்பத்தி பாதிப்பு

வடசென்னை அனல் மின் நிலையத்தில் 630 மெகாவாட் மின் உற்பத்தி பாதிக்கப்பட்டுள்ளது.

திருவள்ளூர் மாவட்டம், மீஞ்சூர் அருகே அத்திப்பட்டு புதுநகரில் வடசென்னை அனல் மின்நிலையம் செயல்பட்டு வருகிறது. இந்த அனல்மின் நிலையத்தின் முதல் நிலையின் 3 அலகுகளில் 630 மெகாவாட், 2-வது நிலையின் இரு அலகுகளில் 1,200 மெகாவாட் மின்சாரம் உற்பத்தி செய்யப்பட்டு வருகிறது.

இந்நிலையில், முதல் நிலைக்கு நிலக்கரி எடுத்துச்செல்லும் 2 கன்வேயர் பெல்ட்டுகள் நேற்று திடீரென அறுந்தன. எனவே, முதல் நிலையில் உள்ள 3 அலகுகளிலும் மின் உற்பத்தி நிறுத்தப்பட்டுள்ளதால், 610 மெகாவாட் மின் உற்பத்தி பாதிக்கப்பட்டுள்ளது.

அறுந்த கன்வேயர் பெல்ட்டுகளை மாற்றும் பணியில் ஊழியர்கள் ஈடுபட்டு வருகின்றனர். அப்பணி ஓரிரு நாளில் முடிவுக்கு வரும் என அதிகாரிகள் தரப்பில் தெரிவிக்கப்பட்டுள்ளது.