தி.மலையில் அண்ணா சிலைக்கு அதிமுகவினர் மரியாதை

திருவண்ணாமலையில் அண்ணா நினைவு தினத்தையொட்டி அதிமுகவினர் ஊர்வலமாகச் சென்று மாலை அணிவித்து மரியாதை செலுத்தினர்.

திருவண்ணாமலை தெற்கு மாவட்ட அதிமுக சார்பில், நகராட்சிக்கு உட்பட்ட 27 மற்றும் 28-வது வார்டில் தேர்வு செய்யப்பட்ட இளைஞர் மற்றும் இளம்பெண்கள் பாசறை நிர்வாகிகள், பெண்கள் பாசறை பூத் கமிட்டி நிர்வாகிகள், எம்ஜிஆர் மன்ற நிர்வாகிகள் மேற்கொள்ள வேண்டிய பணிகள் குறித்து பூத் வாரியாக கள ஆய்வு மேற்கொள்ளும் பணி மாவட்டச் செயலாளர் அக்ரி எஸ்.எஸ்.கிருஷ்ணமூர்த்தி தலைமையில் நேற்று நடைபெற்றது. இதில், சிறப்பு அழைப்பாளராக முன்னாள் அமைச்சரும், வழிகாட்டுதல் குழு உறுப்பினரும், மாவட்ட தேர்தல் பொறுப்பாளருமான பா.மோகன் பங்கேற்று ஆலோசனைகளை வழங்கினார்.

முன்னதாக, அண்ணாவின் நினைவு தினத்தை முன்னிட்டு பெரியார் சிலையில் இருந்து ஊர்வலமாகச் சென்று அண்ணா சிலைக்கு மாலை அணிவித்து மரியாதை செலுத்தப்பட்டது. இதில், நகரச் செயலாளர் செல்வம் உள்ளிட்ட முக்கிய நிர்வாகிகள் பங்கேற்றனர். 